徐濠縈前晚往銅鑼灣欣賞時裝騷，她對外間報道她花男友陳奕迅的錢買衫和夜蒲大感不滿，她表示與男友的關係儼如小夫妻及賓主，只欠生BB。她更指自己全職照顧男友的生活，由財務到煲湯都照顧周到，一點也沒有失職。
徐濠縈、周麗淇、施念慈陳鴻業夫婦及張德豪等人前晚往銅鑼灣，欣賞時裝型店D-mop舉行的fashionshow，有份演出的模特兒包括李燦森前女友趙嘉懿（Carrie）和周汶錡等。
有報道指徐濠縈只懂花男友陳奕迅（Eason）的錢買衫，又與其他男性夜蒲，徐濠縈甫到場即表不滿地說：「啲人有心寫你都冇計，我邊有買過百萬衫，每季都係六位數字啫！」
徐濠縈續說：「其實我幫Eason做好多嘢，我哋嘅關係好似一場賓主，亦似一對小夫妻，係差未生BB啫。我平時幫佢處理財務，佢病同埋開演唱會時，我又煲湯畀佢飲。」Eason這位老闆是否定時出糧給她？她說：「呢啲冇計到。」
徐濠縈更表示與Eason的相處之道，是各自給予對方很大的空間，她說：「好似有啲男朋友係禁止女友着低胸衫，同埋跟其他異性約會，但係Eason兩樣都冇管束我。」
對於傳媒不時拍得她買衫和夜蒲，徐濠縈說：「我夠有好多健康活動好似滑水同做瑜伽，但係佢哋就淨係影我去買衫。」她又透露昨晚中秋夜會到梅艷芳家陪她過節。
此外，身為「米蘭站」代言人之一的周麗淇表示「米蘭站」早前被爆竊，她也是受害者，她說：「因為老闆幫我留起個Hermes手袋，結果都俾啲賊偷埋。」
採訪：JessicaNgan
攝影：HoKwokHo
