港股原先承接力頗強，點知星洲有人唔小心，入實驗室染上SARS，連累恒指兩日大跌354點，10800關口差啲都守唔住。航空、酒店、旅遊、零售及地產股全面下挫，其中新地（016）出現基金洗倉與減磅，大跌5.6%，收報54.50元，成交6.63億元。
e莉莎話，芬佬早前預期樓價回升，將新地股價炒至資產淨值相若水平，即睇好樓價唔會再跌，若SARS重現，樓價回升的憧憬幻滅，市場會重估新地投資價值，股價跌至相當於資產淨值75-80%將在所難免。大家當然希望星洲SARS個案只是一次個別事件，唔會再大規模爆發啦。
SARS重臨，但藥業股唔見特別醒，其中被玩具大王睇中嘅位元堂（897）更大跌17.65%，長江生科（8222）亦跌2.7%，不過同仁堂（8069）就升3%。
華大地產（201）宣布斥資2.3億元買起林伯北角幅地，並諗住用2億元建為三星級酒店，一沾自由行概念，股價一度炒高11.5%，其後升幅收窄至3.3%，收報0.063元。該公司去年底手頭現金只得880萬元，證券投資組合3070萬元，加埋不足4000萬元，如何能應付4.3億元投資項目？黑客估佢一係供股集資，一係就引入新股東資金，甚至可能賣盤。
中電信（728）噚日下午宣布中期業績，但上午已經俾人質低逾5%。市場傳出，公布嘅業績同派息會令人失望。點知下午業績揭盅，半年賺93億元人民幣，增長9%，已算唔錯，但派息就欠奉。有個芬佬話，冇諗過公用股有錢賺居然唔派息。
阿虎