經濟發展及勞工局局長葉澍堃噚晚啟程去歐洲三國訪問，除咗推銷香港嘅港口之外，重係為沙士，希望可以恢復外界對香港嘅信心，不過撞正新加坡有新沙士疑雲，佢真係要落足嘴頭先至掂。
出發去丹麥、荷蘭同英國之前，葉局長噚日下晝重同幾位同事去咗灣仔周老闆間法國餐廳食大餐。八方見到葉局長同佢嘅政務助理，重有阿松嘅兩位前左右手──譚志源同李達志，呢個組合都幾奇怪。細問之下，先至記得李達志已經調咗去葉局長嘅部門，負責機管局嘅上市事宜，而譚志源就去咗政制事務局幫佢嘅舊上司林瑞麟。
記得譚志源曾駐歐洲，唔知葉局長係咪想問路；但有關人士就話，今次嘅行程已經定晒，局長何須問路？咁佢哋見面傾乜？敍舊都得啩，密斟都唔會畀你撞到啦。
傳真︰2623-9278
電郵︰