現年十八歲的戴夢夢將於年尾出碟，唱片公司希望將她捧成少女楊千嬅，而夢夢至今已倒貼逾十萬元學唱歌、跳舞兼置裝，故她要向父母索回做童星時賺落的錢，難怪她說：「藝人嘅風光背後，都係辛酸㗎啦！」
童星出身的戴夢夢，早前簽約環球唱片成為旗下歌手，環球將於年尾替她推出唱片，並有意將她捧為少女版楊千嬅。雖然夢夢還未出碟，但至今她已倒貼了超過十萬元。
日前夢夢在中環接受訪問時說：「我諗我使得最多嘅係學唱歌、跳舞同置裝，公司都有幫我畀啲嘅，但我自己都有畀錢，重有買化妝品、搭車、請助手，全部都要錢，所以我都要問爹哋媽咪攞錢。」
夢夢小時候拍過不少電影及廣告，故她也要動用積蓄交學費，她說：「以前儲落嘅錢，一直喺媽咪度，𠵱家都要問佢攞番，雖然要使好多錢，但我覺得值得嘅，始終做呢行係自己嘅理想！」
問夢夢會否覺得做藝人總是人前風光，背後辛酸？她即說：「個個都係咁㗎啦，台上表演時，台下啲人拍掌，但背後除咗要貼錢外，好似啲人話你有babyfat喎，咁你就要減肥，有嘢都唔敢食，真係好辛酸，我重要去美容院做臉部推脂。」
夢夢加入環球後，唱片公司都有給她五位數字的墊支，但她寧願繼續倒貼，也不想問唱片公司借錢，她說：「唱片公司畀我嘅墊支用晒啦，個個新人嘅墊支都係一樣，𠵱家問公司攞多啲，第日咪要扣錢，所以都係唔攞喇！」
採訪：朱芷瑩 攝影：陳志嵐
場地：Osmosis4
髮型：MorrisTsui（Osmosis4）
化妝：RitaYip（PerfectStage）
