黃伊汶愛收藏書籤及拼貼公仔等，其中以書籤的數量最多，在數百張書籤中，她鍾情於「少女系列」及「日本系列」。黃伊汶又謂最珍惜是拼貼公仔，因為是其父母送給她的，她亦希望日後能向子女展示自己的收藏。
黃伊汶（Emme）頗喜歡收藏書籤及拼貼公仔等物品，Emme表示收藏書籤的目的主要是因為價錢平，她日前說：「以前返學好多同學都會攞好多唔同嘅收藏返學校，但係佢哋買啲嘢都比較貴，所以我以錢為大前提下就揀咗儲書籤啦。幾百張書籤當中我就最鍾意『少女』同『日本』系列，因為啲公仔畫得好靚，而且我覺得書籤上面寫嘅嘢好有意義。」
Emme又展示了一張劉德華書籤，她笑說：「唔知華仔睇到呢張書籤會點呢？有機會都想攞畀佢簽名。」
在Emme眾多收藏品中，亦有貼紙、鉛筆及經典的拼貼公仔，她表示小時候與姊姊及弟弟一起玩角色扮演遊戲，她說：「我哋可以攞住啲拼貼公仔玩足一日，玩到連功課都唔做，所以阿媽就會收埋晒。另外，因為冇人同細佬玩啲男性化嘅遊戲，媽咪驚佢變咗女人型就送佢去寄宿。」
原來Emme決定將所有收藏品留給自己及姊姊的兒女，她說：「𠵱家啲細路唔會知道有呢啲咁經典嘅玩意，咁到時畀佢哋睇到呢啲嘢嘅時候，佢哋就可以清楚知道佢媽咪細個時玩啲乜，咁都可以係一項好好嘅親子活動。」
採訪、攝影：李珮洳
