政務司司長曾蔭權噚日一身官服、結上靚靚煲呔，不過喺下午四點企喺政府總部地下大堂開記者會講緊粵港合作時，佢嘅司機已經將座駕開到門口，車上重掛上一套T恤、休閒褲同皮帶，原來佢趕住去參加四點半嘅公益金便服日啟動禮。
記者去到公益金嘅活動場地，已經見到煲呔換好晒衫，煲呔都除埋，輕輕鬆鬆欣賞幼稚園學生嘅表演《金光童子》，最後重由兩隻扮成老虎仔嘅小朋友引上台。
兩個「老虎仔」又幾搞笑，一上台就自顧自埋位，擺甫士準備影大合照，完全冇理煲呔曾，點知佢兩個成隻「攔路虎」咁，啱啱好封死咗曾司長條路，搞到煲呔曾在全場哄笑中，好尷尬咁用手輕輕撥開兩隻「攔路虎」，先可以行埋位影相。
（圖）煲呔換上便服同鄭海泉（右）及艾爾敦（右三）開開心心咁欣賞小朋友表演。
司徒世華攝
傳真︰2623-9278
電郵︰