無綫近年流失唔少小生，雖則陶大宇、陳錦鴻同譚耀文等舊將回巢，但無綫都要力捧新人，數到無綫呢期最力捧嘅小生，相信都非黃宗澤莫屬。
啱啱播完嘅《戀愛自由式》同播映緊嘅《英雄．刀．少年》，黃宗澤都孭飛做主角，而無綫喺下個月開拍二十五集嘅新劇《我師傅係黃飛鴻》，亦由黃宗澤擔正做少年黃飛鴻。
而李家聲就扮豬肉榮，佢重要步「阿旺」郭晉安嘅後塵，起碼增肥二十磅做豬肉佬，唔知呢次李家聲會唔會愈肥愈旺呢？
青靚白淨嘅陳鍵鋒，喺劇中就扮梁寬，牙擦蘇嘅人選就未定，但都會係新人，至於同黃師傅鬥個你死我活嘅奸人堅，就由馬國明扮演，但呢套新版黃飛鴻就會講奸人堅做盡壞事後，終於被黃師傅收服，最後重做埋佢徒弟㖭。
雖然套劇以捧新人為主，但無綫都搵咗李彩樺做飛鴻嫂莫桂蘭，老戲骨姜大偉扮黃麒英，楊婉儀就演十三姨，但呢次劇情玩創新，竟然話十三姨同黃麒英發展感情，問你服未？
《英》劇全部男演員都要剃頭演出，又要跟師傅學洪拳，早排監製黃偉聲去咗黃師傅嘅鄉下佛山睇景，所以套劇可能會喺佛山取景。
陳慧琳（Kelly）噚日喺台灣一個空軍基地演出，佢同一班軍哥提早慶祝中秋節，大家一齊唱歌跳舞，氣氛熱鬧。Kelly話好想去投考空軍，如果可以自己揸飛機就重有型。其實馮仁昭覺得Kelly識揸飛機，咁佢同男友空中拍拖時，咪可以避開啲狗仔隊囉！
孫燕姿近來成立一間音樂公司，想栽培新人，之前佢已經睇中咗一個女仔，但係對方經過考慮後，都係請佢食檸檬，寧願選擇讀書。
孫燕姿話：「人各有志，我會祝福她的。其實我看到公司如何幫我實現理想，所以我也好希望發掘新人。」佢重話搵到合適人選後，佢會負責幕後工作㖭！
薛家燕噚日喺將軍澳出席「百佳重開鮮魚攤檔」活動，家燕姐重即場撈咗條魚返電視城煮畀同事食，佢話為咗中秋節可以放假一日，所以噚日一日要趕八場《皆大歡喜》嘅戲。另外，新城電台高層甘國亮噚日亦有份出席活動，重透露李鵬飛會返新城開咪㖭！
汪明荃（阿姐）噚日喺銅鑼灣出席《星藝弦曲賀保良》嘅記者會，佢同男友羅家英將會喺下個月五號做粵劇為保良局籌款，不過到時就唔係一齊做，而係各自同其他總理演出，可能佢哋唔想畀人覺得成日喺埋一齊嘅感覺。家英哥因為有工作在身，所以冇出席記者會，所以大家都睇唔到佢哋兩個打情罵俏。
