屋台屋老闆David，回憶起這10年來：「起初以日本食客為主，慢慢愈來愈多本地食客幫襯，有啲由細幫襯到大，有啲由拍緊拖幫襯到結婚兼生埋仔。」記憶中煮過無數拉麵，招呼過好多客人，當中有啲更成為朋友。不論你有否在這裏留低過美好回憶，今個月來吃碗10周年$10拉麵，至少會有一個超抵食嘅回憶。
記者：馬慶武
攝影：梁細權
十年前，日式拉麵喺香港唔算流行，正宗日式拉麵店亦寥寥可數，「當時要經營日式拉麵店，一定要吸引日本客，要吸引日本客就一定要夠地道。我鍾意煮嘢，開日式餐廳係我嘅夢想。」
因為崇尚日本文化，加上為夢想鋪路，David曾於日本留學兩年學日文，當時咁啱搵到一份拉麵店兼職，學到唔少煮拉麵秘技，之後David返到香港做咗兩年導遊儲夠錢就完成佢嘅夢想。開業一年後重開多間分店㖭。
「97前好多日本人嚟香港做嘢，太古城多日本人住，所以當時好多日本人嚟食拉麵，舖頭爆滿差不多全部都係日本客。」David重話曾經試過有個日本相撲手嚟：「一個人坐兩個位先夠，嗰晚佢食咗3碗拉麵，8客餃子，重邊食邊讚我哋煮嘢有誠意㖭。」每逢講起以前幫襯過嘅客人，David都特別興奮。
𠵱家好多日本客都回咗國，但有啲舊客返嚟香港旅行都會探吓佢兼食拉麵。「有個日本舊客返嚟旅行時嚟食麵，坐番以前坐過個位，重同我講『呢個煙頭印我整㗎！』」David話因為間舖都開咗10年，其實都諗住翻新一下，不過就係因為呢次對話，令佢覺得好唔捨得舊有嘅裝修，所以𠵱家重掙扎緊會唔會重新裝修。
梁先生：「差唔多幫襯足10年，呢度啲拉麵、烏冬都好好味，湯底味道調校得好好。$10一碗拉麵咁平？咁呢個月就要幫襯多啲支持吓喇。」
屋台屋日本料理
地址：鰂魚涌基利路7號太吉樓地下2號舖
電話：28800655
營業時間：
星期一至五：12:00nn-2:30pm、6:00pm-11:00pm
星期六及日：12:00nn-3:30pm、6:00pm-11:00pm
＊$10一碗拉麵優惠由即日起至9月30日，星期一至五晚市供應，星期六、日及公眾假期全日供應，每枱限叫一碗。