深圳福田皇庭世紀上個禮拜六內購，一日賣咗六百七十伙，套現兩億人民幣，呢啲場面喺香港都好耐冇見過嘞。
樓盤代理置業國際講，總共接到二千四百個認購，當日有五千幾人到場，上晝十點開始揀樓，直到晚上九點至完成晒簽約手續。據講簽約區同一時間可以服務四十名買家。發展商當日重請咗中央電視台「實話實說」主持做嘉賓。
樓盤首批推出四百二十八伙，即場兩度加推，售價加咗百分之三至四㖭。
一名本港商家，前日就用咗八百萬，買入二十個皇庭世紀作投資，呢位豪客係置業國際嘅舊客。
皇庭世紀共有九座二千零四十五戶，面積四百三十至一千三百二十方呎，內購呎價最高六百一十三人民幣，明日喺深港兩地同步公開發售，料必熱賣，真係恨死隔籬。
香港置業置專會噚日趁中秋節前夕，由會長姚偉南帶領十五名會員，到灣仔聖雅各福群會李節街護老之家，同真光護老之家，送贈月餅同生果畀一百七十幾位長者，重同佢哋傾偈，氣氛溫馨。
另外，蘭西噚日提到，中原有兩組同事今個月佣金已過一百萬，香港商業部C組係其中一組，董事黃瑋琮話，主要係靠促成兩單逾八千方呎甲級寫字樓租務，收到近九十萬佣。
太古鰂魚涌逸樺園會所又有新設施，特製專為孕婦而設嘅按摩床、一百五十呎闊銀幕，男女住客都照顧周到。
為答謝現時持有太古物業嘅業主，太古高級營業經理馬淑貞話，由今年一月一日起，持有旗下住宅嘅業主或親屬，購買逸樺園可以按二十四個參考單位售價，購入對上一至三層嘅單位，例如持有一個物業嘅業主，可選購指定單位嘅對上一層住宅，上限係三個單位，優惠最高相等於十萬蚊。
電盈薄扶林貝沙灣一直都係豪宅市場焦點，藝人劉德華喺第一期推出時，已經買咗個，最近第二期開售又搞得如火如荼，劉天王再度去睇示範單位，似乎對呢個盤情有獨鍾，唔知係咪想買多間嚟投資呢？另外，市傳轉行賣環保用品嘅盧冠廷就買咗一個單位。
貝沙灣每次推出，都有好多大家意想唔到嘅新招，蘭西噚日就收到電盈貝沙灣二期嘅資料冊，包裝同一期完全唔同，更加有氣派，夠晒心思。
發展商咁重視個盤，代理梗係唔可以掉以輕心啦，美聯噚日開始，喺全線二十八間豪宅天下分行，張貼六款貝沙灣二期嘅海報，重請嚟電盈營業及市務總監顏金施出席呢個宣傳記招。利嘉閣噚日就喺尖沙嘴香港童軍中心舉行推介會，有近二百五十名代理出席，顏小姐都有到場。
標榜紐約曼克頓情懷嘅長沙灣宇晴軒，噚日開放第二個示範單位供傳媒參觀。個單位非常配合樓盤嘅主題，設計師何定豐話，用咗一百萬裝修，地台特意加高幾吋，鋪上大幅曼克頓夜景相，旁邊裝置燈箱，投射出燈光，連同窗外嘅市區夜景，有如置身紐約觀光塔，有繁華大都會之感。
發展商重喺鄰近售樓處，倫敦廣場外面嘅宣傳大電視，做密集式廣告，每兩分半鐘播一次，用強勁嘅廣告宣傳攻勢，加深市民對宇晴軒嘅印象。
蘭西
電郵地址：
