小初本來諗住星洲沙士事件，會嚇多大家多幾日，所以諗住炒家會唞一唞。但經紀陳話，噚日掛牌嘅錦藝紡織（565），有班大陸客幫手，所以應該唔止炒一日咁少。
錦藝都算近期少見熱鬧嘅新股，第一日掛牌收0.72元，比起招股價0.50元，高出44%，成交2.64億股，金額有成1.7億元。
小初之前冇留意錦藝，但就有留意同樣係紡織行業，但size大好多嘅魏橋。魏橋就快上市，聽聞招股反應好理想，小初諗住炒大唔炒細，點知原來Smallisbeautiful。
經紀陳話，規模大細根本唔重要，最緊要係錦藝有班大陸炒家照顧，所以至有咁好成績。
不過，佢話如果嫌錦藝升得太勁，現時跟風冇乜肉食，可以返轉頭睇吓同樣係紡織股嘅華豐（364），隻股自從批完股後，股價一直冇乜表現，噚日再隨大市回落3.9%，收0.99元。聽聞班炒家重未離場，等候時機再翻炒。
慕容小初