八方上次講過，財政司司長唐英年臨時改行程，唔去廈門改去墨西哥坎昆，佢呢次身份係「主席朋友」，幫助墨西哥外長擺平各方矛盾。今次唐司長有幾威？睇睇無綫電視記者，一個工作日就搞掂晒所有申請手續就知啦！
話說無綫本來對採訪世貿第五次部長級會議冇興趣，所以在八月十五日大會截止日期前冇報名，但到咗上星期六（九月六日）知道唐英年會以「主席朋友」身份出席，加上香港申辦第六次部長級會議，先臨急臨忙叫記者鄭麗矜搵香港政府救命。
香港政府都算把炮，本來要四個工作日先拎到嘅簽證，佢哋星期一上午就搞掂墨西哥領事館，即日發簽證，重搞掂大會通融畀無綫即時報名，鄭麗矜可以星期一晚同唐英年齊齊飛去墨西哥。
八方知道台灣《蘋果日報》只係遲咗幾日報名，台灣代表團講晒情，大會都冇得傾，唔知係有人太夠照定係有人太唔夠照？
講番個會，因時近911兩周年，墨西哥保安極度嚴密，今年索性將坎昆會議中心的代表區全面封鎖，記者及非政府組織代表，除非有專人帶領，否則完全不能接觸代表，怕且今年都好難抗議。
記者唯一接觸到代表的機會，係打聽雙邊會談的時間地點，因為會談多數在酒店舉行，保安較鬆，記者有些採訪空間；但係中國商務部長呂福源好口密，等咗成日至等到佢，點知佢連首次以代表身份出席會議嘅感想都唔答，希望佢只係未熱身啦。
傳真︰2623-9278
電郵︰