阿根廷噚日朝作客委內瑞拉踢世界盃南美洲區外圍賽，由於呢支南美勁旅之前主場被智利迫和，令到莊家一開盤都只係要阿根廷「少讓」一球。但你咪當我哋唔識波至得㗎，兩隊實力爭咁遠，結果臨場阿根廷就俾人買到要讓兩球！
正如為呢場波畀貼士嘅波王話齋，就係因為阿根廷喺第一場對智利嗰陣贏唔到，呢場就更加刺激到佢哋要贏波搶番三分。雖然係作客，但由於委內瑞拉一直都係南美洲「魚腩」，以阿根廷質素，初盤讓一球都真係坐和望贏。
結果艾瑪繼續發威，基斯普及迪加度再各入一粒，最後贏夠三球，捧場客個個都四萬咁嘅面口囉！
阿蘭拿斯噚日喺過檔巫師嘅記者會上口出狂言，話保證巫師今季可以殺入季後賽，連鼎鼎大名嘅波神米高佐敦兩年前復出時，都唔敢寫包單話保證巫師入季後賽。𠵱家阿蘭拿斯竟然話要超越波神，帶領巫師入季後賽，勇氣可嘉，不過有些不自量力，似乎幫自己博宣傳多啲。
中國男足完成美洲熱身賽，可惜最後一場依然要輸波，對紐約大都會一比二敗陣。總結四場成績得一和三負，除咗對洛杉磯銀河無失波外，其餘三場都俾對手攻入。不過，我求大俠覺得輸波都唔係壞事，起碼畀班新球員吸收經驗；但好似首場對海地不設防輸三比四，就唔好再出現。
比拿美、沙維治同迪蘭尼因停賽，冇得喺噚晚場歐洲國家盃外圍賽，替威爾斯上陣鬥芬蘭。原本佢哋諗住留低為隊友打氣，但就得唔到領隊曉士同意，重要提早返球會報到。咁又係，威爾斯贏波就話啫，如果失分，佢三個就成為罪人，所以曉士送佢哋走，都可以理解嘅！
由於之前由體育組同事精心炮製嘅四大聯賽特刊，有部份內容因為時間關係，被迫提前完成，令資料同事實有所出入。為答謝大家支持，由今日起一連兩天，本報會再一次刊登四大聯賽最新最齊球員名單，今日先刊英超聯及德甲聯，聽日就輪到西甲聯及意甲聯，咪錯過呀！