惡佬明喺地盤雖然惡死，治理工人甚嚴，但到咗馬場會員餐廳賭馬，就夠晒斯文。無他者，會員席內有衣着要求，唔准穿着牛仔褲、短褲、波鞋、涼鞋，目的就係要求馬迷入內，比較斯文一啲；既然如此，行為、語言亦應該斯文，唔好太粗魯。惡佬明喺地盤講慣粗口，亦多大聲呼叫，但喺會員餐廳，就陰聲細氣，行為語言與會員身份相稱。況且，到咗馬場，目的係求財，賭馬要精神集中至易贏馬，粗聲粗氣，有失斯文之餘，對最大目的——贏馬，毫無幫助。
但有啲唔知乜料嘅會員，以為自己好醒，睇唔到電視機上嘅獨贏賠率，就大聲喝罵侍應，遠近皆聞，令全場側目。馬會負責投注嘅職員，俾佢鬧到面青，又驚佢向上頭投訴，直情不知如何是好。惡佬明上星期六喺紫荊廳見到一位仁兄惡得咁緊要，幾乎想同佢駁嘴，後來見到所有其他人都唔出聲，自己亦忍番啖氣，但情緒因此受到影響，睇唔到李大董隻「高山名望」臨場搏命落飛，只識得買「高耀之星」，結果呢兩隻馬串Q，派彩和味，惡佬明大歎走寶，亦覺得係受嗰位嘈到拆天嘅會員騷擾之故。
惡佬明話：「以後再有人咁嘈，我一定第一時間向實Q投訴，要求將佢趕走！」呢個意見幾好。不過唔知啲馬會實Q有冇行動指引，去處理呢類粗魯會員呢？