一部電影成功與否，其實要睇好多因素，好似妻夫木聰同松田聖子個女SAYAKA孭飛嘅大製作電影《DragonHead》，原裝漫畫賣成六百五十萬本，好鬼犀利，而電影就揼咗成十五億日圓（約一億港元）製作，全片喺烏茲別克取景。
起初大家都以為咁大製作套戲實掂梗，點知《DragonHead》上咗畫大約兩個禮拜，首個星期嘅票房都只係啱啱好掹住第五位，令人跌晒眼鏡，睇怕唔蝕本都幾難。
我羅拉原本對妻夫木呢齣戲好有期望，重即刻買咗本《MakingofDragonHead》先睹為快，睇吓妻夫木同SAYAKA遇上新幹線車禍後，發覺原來係世界末日來臨，東京變成頹垣敗瓦嘅景象係咪真係咁恐怖。
不過姑勿論劇情同演員係點，睇呢本製作特輯，裏面嘅特技同布景場面真係能夠做到人類死路一條嗰種絕望感覺，聽講話淨係戲入面嘅灰塵都用咗六十幾噸㗎！
我羅拉咁八卦梗係四圍收風睇吓套戲衰喺邊，原來衰在演員卡士唔夠照，一來冇老戲骨做綠葉，二來一向觀眾緣差到痹嘅SAYAKA，佢嘅演技真係令人冇興趣入場喎！一向甚受年輕人歡迎嘅妻夫木話過拍呢套戲辛苦到食唔到、瞓唔到、屙唔到，搞成咁，相信佢見到票房咁慘淡，實喊餐死！