香港體壇有一個怪現象，做運動員不但未能像外國選手般創業興家，就算討生活亦十分困難，籃球好手蔡淦華（Steve）深明這個道理。去年，Steve因一次交通意外斷腳，令他無緣參加釜山亞運；受到沉重打擊下，Steve毅然放棄籃球事業，轉當私人健身教練，將多年的健身經驗發揚光大。 文：李勇明 圖：黃冠華
中學二年級已有六呎三吋高的Steve，他的天賦本錢在學界籃球賽無往而不利。九五年，當時只有十七歲的他已獲甲一組籃球隊福建招手，首次在本地最高水平的籃球賽事中亮相。「嗰時自己雖然夠高，但上身就偏瘦，所以開始同朋友一齊去做Gym練大隻，等打波時更有爆炸力。」Steve說。
「當時打籃球幾乎係我嘅生活全部，我去健身都係為咗打籃球打好啲。最初接觸健身時，其實都幾辛苦，但我仍堅持每星期做三至四次Gym；不過之後見到胸肌同手臂好似大隻咗，就特別有滿足感，幾辛苦都覺值得。」
七年的甲一及港隊籃球生涯中，Steve曾代表香港參加多項國際賽，其中包括九九和○一年的世界大學生運動會，先後與NBA網隊球星馬田和火箭中鋒姚明同場競技，令他畢生難忘。去年釜山亞運前夕，Steve因一次電單車交通意外斷腳，被迫退出港隊；醫生更建議Steve今後不宜作劇烈運動，誰不知，這個飛來橫禍卻改變他的人生目標。
「我決定利用自己多年嘅健身經驗，考個專業健身教練資格（IPTI）。以前打波，加埋教波津貼，一個月都有萬幾蚊收入，但缺點係唔穩定；現在教健身，由於係收佣性質，正式係多勞多得，收入穩定得多。」Steve加盟CaliforniaFitness不足一年，目前已是位炙手可熱的私人健身教練，每天的預約排得滿滿，工作時間由早上八時至晚上十一時。
籃球場帶給Steve的滿足感，原來在健身室亦能找到。「記得有個十四歲後生仔，叫我幫佢增高。其實以佢年紀，根本唔適合做重力訓練；所以我為佢設計幾種由拉筋、帶氧運動及阻力訓練組成嘅健身方法。佢好勤力練習，最後重練到病埋，嗰時我都幾擔心，不過幾日後佢再嚟，話畀我聽真係高咗嘅時候，嗰種滿足程度同贏工商盃差唔多。」
英文名：Steve
年齡：25歲 身高：6呎3吋 體重：190磅
上季效力球隊：太平洋電訊
現職：CaliforniaFitness私人健身教練
個人榮譽：97及98年學界馬拉松籃球賽、最有價值球員
出席籃球大賽：
97、99及01年亞洲盃
97年全國運動會
99及01年世界大學生運動會
00年全國大學生運動會
