大部份到台灣自由行的港客都不離兩個主題，一為「買書」二為「食」。廿四小時的「誠品書店」是港客必到之名勝，特別嘈嗰班就多數係講廣東話嘅港客。大家一袋二袋地將書抬返香港，其實好多書香港都有得賣，但係硬係鍾意喺台灣買。「誠品」有很好的買書氣氛，首先係冇店員會催你或住你，遇到搵唔到嘅書時，店員又會非常落力地幫忙，萬一真係有本書搵唔到，店員分分鐘重失落過你。
自己行「誠品」的習慣是漫無目的地由頭至尾行一次，大約用一個鐘頭時間睇吓有咩書好買，然後攞個購物籃，將感興趣的書放入籃內，此過程又用咗一個鐘頭，最後求其搵個樓梯級，席地而坐，逐本書認真地揭一揭，認為真係買的才磅水買。呢個坐喺地下睇書嘅過程都幾重要，杜絕了因為封面靚而買錯書，另外在「誠品」內有大把人通地坐，所以完全唔會覺得異相，你有你安靜地睇書，我有我搵書兼睇女仔，特別係禮拜六嘅晚上，不少打扮得很漂亮嘅女孩子會在「蒲」前或「蒲」後到「誠品」打發時間，呢個係去「誠品」最好嘅時候。
「誠品」附設嘅咖啡室食物水準都唔錯，一杯番茄沙冰、一客公司三文治、一件芝士蛋糕，一大叠書，坐個天荒地老，悠閒得很。