日本靚女伊東美咲原來早排靜雞雞去咗日本鐮倉，拍攝會喺呢個月推出嘅全新寫真集《美咲》。而噚日推出嘅日本雜誌《WeeklyPlayboy》同《Frau》，就率先披露寫真入面嘅相片，當中最震撼嘅，自然係伊東浸喺個大木盆入面，大晒光滑背脊嘅鏡頭。
伊東本全新寫真集由日本名攝影師上田義彥操刀，佢叫伊東幻想自己去咗間浪漫旅館度假，所以伊東拍攝嘅時候，以一個好relax嘅心情面對鏡頭。伊東喺旅館度擺出唔同嘅動作，一時喺榻榻米上面睇書，一時又除剩內衣坐喺房間，表現得好淡靜。
不過伊東好擔心fans嫌本書唔似佢以前本水着寫真集咁有多肉睇，所以加插咗出浴鏡頭，半裸坐喺個大木盆入面浸浴。我羅拉覺得淨係睇伊東咁光滑嘅玉背，已經值回票價啦！
伊東話拍呢輯寫真嗰陣，諗起童年時喺鄉下福島嘅寧靜生活。佢亦好hardsell咁話fans可以喺本書入面睇到喺雜誌同電視上見唔到、淨係佢屋企人同情人先見得到嘅真正伊東喎！