俄國油王阿巴莫域治今屆入主車路士之後大灑金錢買人，但外間始終認為佢玩玩吓；不過，佢喺前日撬走咗曼聯嘅行政總裁簡安，話明要車路士喺場內外都成為世界最頂級球會，睇嚟今次嚟真！
唔好睇簡安個樣普普通通，原來曼聯成為世界最富有球會之一，佢有唔少功勞，好似曼聯同Vodafone，以及與nike嘅巨額贊助合約，都係簡安傾番嚟；而荷蘭國腳前鋒雲尼斯達羅由恩浩雲轉會「紅魔鬼」，亦係簡安斟番嚟，雲尼斯達羅𠵱家喺曼聯乜嘢待遇同埋賺幾多，佢就最清楚。唔怪得英國傳媒已經吹晒風，話喺轉會市場於一月重開時，車路士會重金禮聘雲尼斯達羅加盟啦！
日本前鋒柳澤敦今季登陸意甲即搶去同胞中田英壽、中村俊輔唔少風頭，日本貼身隨行記者都多過中田同中村。據講，柳澤敦喺第一場波對里賈納表現拚搏，已得到森多利亞球迷歡心；再加上佢性格開朗，識埋堆，好快同隊友格蘭當尼同埋馬拉仙拿做咗老友，一個字：掂。
碧咸唔單止係潮流指標，原來重可刺激經濟。博彩公司威廉希爾話自從碧咸過檔皇馬後，多咗人賭西甲波，令九月初嘅西甲投注總額比去年同期升咗兩成三。另外，連本港球迷都因碧咸踢皇馬而留意西甲聯，加上收費台嚟緊有得播，馬會嘅西甲足智彩捧場客都會繼續升。
係人都知德國佬鍾意喺大戰前放煙幕，話邊個唔出得，最新消息話戴斯拿同謝利美斯都打唔到今日對蘇格蘭場波，經我求大俠查探過後原來真有其事。但係，德國佬向來老謀深算，咁做擺明係想蘇格蘭對佢哋掉以輕心，而福士以前係德國教頭，唔知會唔會中佢哋計呢？
西班牙「小活佛」迪拉彭拿同埋葡萄牙前鋒丹尼，喺歐洲球壇都算薄有名氣，而且重好當打，兩個𠵱家都只係二十六歲，不過際遇就同樣坎坷，目前都冇班落，更喺星期一雙雙去咗蘇超聯球隊些路迪試腳。不過，些路迪領隊奧尼爾對佢哋試腳就反應麻麻，都咪話唔欷歔。