電盈嘅薄扶林貝沙灣，大賣富豪級數豪氣。今個禮拜六喺現樓嘅博覽館同售樓處，搞中秋豪華晚宴，邀請城中名人出席，到時必定星光熠熠，重現今年情人節盛況。
被邀請嘅嘉賓，位位都大有來頭，分別有唱爆玻璃嘅男高音莫華倫，海域集團副主席許浩明，華南集團太子女吳旭苿，重請嚟第十四屆蕭邦國際鋼琴比賽金獎得主嘅李雲迪，嚟一場鋼琴演奏，為該盤揭開序幕。
呢個叫座力咁強嘅豪宅，唔少人已率先預留二期單位。中原董事唐秉正係其中之一，佢叫太座趁樓市轉勢，搵合適投資物業收租，點知一睇完貝沙灣，就落槌買咗第三座一千六百方呎單位，成八百二十萬，每呎五千一百幾蚊，租金回報應過五厘。
而電盈副主席袁天凡嘅親戚，就用六百三十萬買咗個二座A室，千三呎。
唔少人買樓都好注重物業嘅風水，所以風水師愈嚟愈吃香，好似香港著名堪輿學家蔡伯勵，佢早前幫畢架山一號二期一名業主，落地盤實地睇風水，就收咗十萬。
噚日蘭西參觀騏利集團發展元朗明珠花園，原來個名係由蔡伯勵起嘅，發展商深知中國人篤信堪輿命理，所以喺樓書內特別提及物業命名由來，令樓盤喺環境、用料、間格以外，多個煞食賣點，果然高招。
本港發展商樓盤紛紛向內地客招手，利嘉閣地產執行董事廖偉強話，公司早前就安排六名廣州商務客嚟港，由董事總經理何紹章陪同，參觀佢哋獨家代理嘅薄扶林華富道8號，實行肥水不流別人田。呢個由越秀投資發展嘅樓盤，共有一百二十個六百到九百方呎單位，正等緊批售樓紙。
講開內地商務客睇樓團，利記上個禮拜帶隊去廣州，拜會當地發展商同客戶，交流樓市意見同辦內地商務客來港睇樓團。原本由廖偉強帶隊，但因發展商嘅一手樓紛紛出擊，所以留守大本營，由何紹章擔大旗。聽講好快就有團落嚟嘞。
上海經濟發展勢頭理想，房地產業更被喻為當地六大支柱產業之一，唔少本港上市公司喺嗰度有地產投資，當地樓市自然多人關心啦。基強聯行下個禮拜四同五，喺上海舉辦「投資上海投資未來2003」房地產論壇，介紹上海嘅投資環境，同推介重大投資項目。
呢個論壇重請嚟喺上海投資成功嘅發展商，同大家分享經驗，港人熟悉嘅有和記黃埔、麗豐控股同新加坡凱德置地。
香港投資者多啲了解上海樓市，喺作出投資決定時，就更加有把握同信心啦！
樓市氣氛好番啲，代理行梗搏到盡啦，中原地產就設下「億元佣金中秋大獎」激勵員工，今個月內，住宅同工商舖部若果做到一億數，佣金過一百萬嘅組別，就可以攞到五千蚊獎金，過一百五十萬有一萬蚊，過二百萬係兩萬蚊。
聽講今個月頭七日，中原已有兩個組別佣金過百萬，另有逾十組過六十萬。睇番中原網頁，住宅同工商舖部今個月頭八日，佣金係二千八百七十萬，由於大前提係要總數過一億，各達到目標嘅組別先有獎金攞，睇嚟各代理都要再加把勁至得嘞。
蘭西
電郵地址：
