懶人又要潮到會紋身隨傳隨到

人，如你和我，因為懶，所以有到會服務。
想紋身？不一定要到紋身館，按鍵，講低地址，專業紋身師傅上齊架生等開工。
想玩占卜？不用到老廟，一個電話，占卜師隨傳隨到。
想拍寫真？撥個輪，沖乾淨涼抹乾淨水，攝影師隨時OnCall。
足不出戶，一樣可以想點玩就點玩。

記者：陳漢榮　攝影：朱崇德

無聊身痕即興紋身
下午三時，三個美少女賦閒在家，早有紋身經驗的Carmen忽然身痕：「不如我哋紋身咯！」一呼，未能百應，阿湯耍手：「我怕痛，既怕老爹詐型，又怕男朋友鬧！」阿婉擰頭：「我怕遠，山長水遠，懶得搭車，上到紋身館又唔知使唔使等，咪搞。」Carmen預了她們這樣說：「到會咪得囉，喺屋企紋身又唔使嘥時間，怕痛咪玩臨時紋身囉，7日甩色，唔使睇人面色。」致電相約紋身師傅，45分鐘後門鈴響，阿Lo氣喘喘由尖沙嘴趕到荃灣。

■「今次想紋邊？」阿Lo開門見山，在後頸和腰已有兩個紋身的Carmen今次決定紋小腿！

■永久紋身與臨時紋身，阿Lo一樣擅長，Carmen堅持前者，怕痛的阿湯與怕遠的阿婉只敢試後者：「阿Lo話有最新出的臨時螢光紋身，紋番個蒲D肯定潮爆，況且一個禮拜貨仔，玩吓無妨。」

■永久和臨時紋身的最初步驟都一樣，紋身師用Training筆在蠟紙上勾出圖案線框，蠟紙印在想紋的位置，噴水，就會現出圖案線框。阿婉心口就多咗個靚靚蝴蝶。

■阿Lo自認好「色」之徒，提供多樣顏色給客人選擇，左邊是普通永久顏料，中間是夜光永久顏料，右邊是臨時螢光顏料，大家一致決定要發光！

■到上色程序，就快完工啦，不過呢環就最痛，只見Carmen全程面容扭曲擺明死頂，不過冇耐就見到個型仔紋身喺腳上，佢就好堅定：「痛一陣有乜所謂！」

■只做臨時紋身的阿婉就輕輕鬆鬆，話咁快心口就出現一隻螢光蝴蝶，奪目耀眼，但就完全唔痛。

■Carmen：「痛就一定有，不過阿Lo手勢好，痛極有限，個圖案紋得好整齊，我畀95分。」

■阿湯：「漸變橙色，好Sharp。」
■阿婉：「紋啲敏感部位，喺屋企始終覺得安全啲！」

唔靠老竇自己玩
阿Lo的父親「肥佬」是老牌紋身館的創辦人，自幼對各式各樣的紋身圖案感興趣，師承父親11年，1年前，「肥佬」認為阿Lo已滿師，允許他在舖頭幫手，但年少望出頭，不望靠父蔭，遂往美國深造：「鬼佬係最好嘅人肉實驗品，乜敏感位置都夠膽死紋。」回港，在尖沙嘴百利開舖，兼做到會服務，Carmen就是他的熟客。

到會小資料
店名：DeltaTattoo（尖沙嘴漆咸道南百利商場1樓58號舖）
姓名：阿Lo
電話：94290865（2小時前預約）
收費：面議，視乎圖案複雜程度而定，永久紋身$600至$800，到會加$200；臨時紋身$80，到會雙計。

■紋身槍，美國貨，阿Lo：「300美金，唔算貴嘢，貴唔代表好，槍最緊要啱揸手。」

少女心事隨時有人聽
Erica與Calinda自認神婆，最愛塔羅牌占卜，枕邊細語互吐愛情事，心血來潮就想卜一卜，夜已深，仍硬着頭皮致電廟街十三：「夜晚十點幾咯喎，重嚟唔嚟幫我哋占卜？地點西貢。」「少女心事，唔幫唔得！」十三隨即收檔，乘車直入西貢，半小時到達。

■在桌上鋪上有星星月亮的「招財布」，老早預備好的4副塔羅牌十字叠起，凝聚精神念力。

■4副塔羅牌，用途各有不同，分別用來問性、事業、愛情，最尾一副是十三的私人牌，只作生招牌及加強念力之用。

■Erica外表斯文內裏Open，問性，得出的結論是：男友在精神及肉體上都視她如珠如寶，逗得她大樂。

■Calinda問愛情，得出的結論是：男友玩舊情復熾，第三者是男友的舊情人，橫刀奪愛在所難免。

自號十三
十三，是他給自己的外號：「喺廟街擺檔第一日，循例要同自己卜一卜，一抽就係第13隻牌，隻牌代表死神，寓意先死後生，重新開始，證明我無入錯行。」確實沒入錯行，白晝有正職的他，添多個占卜師的身份，每晚7時在廟街擺檔，收入大增。

到會小資料
姓名：十三
檔位：廟街新公廁前
電話：93390764（2小時前預約）
收費：指定問題詳解$60，指定題目詳解$100，到會每人加$20（需同時湊夠4人），學生半價

忽然想性感　屋企拍寫真
晚上七時，Miu望着鏡子，顧盼自憐：「乜得我原來咁索？」心諗至此，忽有拍寫真之衝動，忙致電攝影師Dick：「我想拍寫真，有冇時間？」「地點、想點影？速講！」「小鳳仙、Tube-Top加短褲，重有……我想影全裸但又唔露點……」「明白，畀半粒鐘時間我，即到。」不用30分鐘，身在銅鑼灣的Dick已抵達Miu在觀塘的寓所。

■代表現階段同男友靈慾一致，好準喎！
半裸皇后

■唔知話我定係話個第三者呢？我會努力維繫呢段感情。
權杖女皇

■Dick很專業，入房即時入局，Set燈Set腳架，快手快腳。Miu就第一次拍寫真，尷尷尬尬，笑容僵硬，惟有口窒窒提出要求：「我要影出嚟嘅效果係……性感而不令人反感。」為緩和她緊張的情緒，Dick耐性地指導，先給她看相辦，着她模仿相中人的姿勢。

■講兩講，Dick見Miu已沒有了剛才的靦覥，於是打鐵趁熱：「又話影全裸寫真？想點影呀？」Miu於是先來個自選動作，就係咁。

■再拍張寶麗萊，有這張即影即有相，好辦事得多，一來可讓Miu知道相片效果梗概，二來Dick可修正自己的拍攝角度。

■最後由Dick做導演，再來張攬公仔照，出來的效果，果然「性感而不令人反感」。

有錢賺又有得玩
入行，全因8年前一次無聊跟朋友學玩攝影，誰知一試上癮，朋友的教導加上自己不斷的鑽研，3年前學有所成，自信可靠相機與菲林討生活，現專拍婚宴、CatwalkShow、人像寫真、剪綵，還在長沙灣開影樓，有自己的沖曬房。Dick是攝影發燒友，就算平時無Job，也會走上街頭狂拍SnapShot自娛，有Job到，即應約，原因簡單：「影相好好玩，有錢賺又有得玩，何樂而不為？」

■Dick享受處身影樓的感覺：「有相影我就開心。」

到會小資料
姓名：Dick
電話：93206704（4小時前預約）
到會收費：
135菲林2筒共72張：$1,500
120菲林2筒共10張：$2,000