新車速報：<br>新版豐田Rav4變臉再出戰

新車速報：
新版豐田Rav4變臉再出戰

早前在日本推出嘅Faclifted新版豐田Rav4，外形及車廂布局都有改動，明顯較舊有型號來得吸引；而某大獨立車行，更率先引入配用一台1.8公升偈嘅新版Rav4抵港，並以極吸引嘅價錢推售，睇嚟定必惹來一班年輕車迷追捧呢！

記者：鄭達基　攝影：陳偉林
ImageGirl：Irene
逢星期一至日出版

稍作改動外觀更型
向來以年輕車迷為針對目標嘅豐田Rav4，自新一代型號推出以來，一直憑住其年輕賣相去吸引用家；而大家眼前呢部Facelifted新版型號，就因為廠方為其換上新款鬼面罩及頭泵把，因而令造型變得更具吸引力，襯以四輪16吋合金胎軨組合，望落較前來得更型之餘，兼且重倍添有一份活力感。

■車頭泵把屬新設計，令賣相變得吸引。

■一組頭燈屬Xenon燈配搭，照明度較前提升不少。



車廂闊落坐得舒適
另一方面，車廂布局看來亦與原有型號相近；但細心留意下，不難察覺中控台及軚盤都屬新配搭，吸引度高之餘，當中新款三幅式軚環更見把持感十足，轉向倍覺輕盈呢！車廂空間又見寬敞闊落，加上前後兩排承托力十足嘅座椅，乘坐舒適度十足唔在講，當遇有需要時更可將後排收摺放平，以增加尾廂載物容量；而車內亦設有多個儲物匣，不但方便擺放雜物外，亦能貫徹一份RV個性㗎！

■三圓白底跑車表板設計，響銀白框邊配襯下，吸引力油然而生。

■略作改動嘅車廂鋪排，較前更能顯現出一份年輕活力感。

■前排座椅極富承托力，乘坐舒適度十足。

■中控台除經改動外，更預留有音響組合位置。



1.8公升偈輸出足
呢部新近抵港嘅Facelifted新版豐田Rav4，係以一台編號1ZZ-FE嘅1.8公升直4DOHC偈作動力核心，雖然輸出較現行代理售賣中嘅2.0型號為低，但仍見動力充沛，匹配一套4前速自動波箱，起步加速亦見敏捷有勁，加上響豐田獨有嘅VVT-i技術輔助下，亦可有低耗油量嘅特性呢！而由前輪麥花臣支柱，及後輪雙搖臂組成嘅懸掛系統，喺剛強底盤輔助下，行車循迹性亦見不俗呢！

■當遇有需要時，後排座椅可左右獨立收摺，以增加尾廂載物容量。

■後排中央設有杯座，方便實用。

■一套4前速自動波轉檔靈敏暢順，能令引擎發揮至極。

■全新三幅式軚環把持感十足，轉向輕盈準確。

Xenon頭燈最實用！
筆者覺得新車外形變動雖不多，但勝在頗具吸引力，當中一對Xenon頭燈組合，更能提高晚間行車安全性呢！然而，一台1.8公升直4偈，響VVT-i技術輔助下，亦能有慳油好力嘅特性。

Irene話部車賣相吸引
呢部Facelifted新版豐田Rav4，外形變得更吸引之餘，仍貫徹有一份富有年輕活力感嘅CityRV形象，而中控台布局亦經過改動，設備齊全之餘重好靚㖭！

豐田Rav41.8五門版規格
引擎：1794cc直4DOHC
馬力：125ps/6000rpm
扭力：16.4kgm/4200rpm
傳動：4前速自動波，前輪驅動
懸掛：（前）麥花臣支柱（後）雙搖臂
制動：（前）透氣碟（後）鼓式（ABS）
輪胎：215/70R16ToyoTranpathA14
尺碼：4155×1735×1680mm
軸距：2490mm；車重：1220kg
平均耗油：14.4km/L
新車售價：$209,000
車輛提供：富利堡汽車（28776700）

■新車沿用一台1.8公升直4偈，性能表現絕對毋庸置疑。