哥哥張國榮雖然喺今年四月一日已經離開人世，但係佢嘅聲音仍長存人間，後日係哥哥嘅生忌，聽日又正值中秋，前晚就有歌迷買咗兩束鮮花同埋兩個獨立包裝嘅月餅，擺喺哥哥故居加多利山寓所門前致意。
除咗歌迷送月餅之外，一班哥哥生前嘅圈中好友都好有心，今晚會搞一個紀念哥哥嘅演唱會，眾星都會出一分力，好似張學友、梅艷芳都會喺今晚聚首一堂，翻唱哥哥生前嘅首本名曲，而連日嚟有份參與嘅歌手亦已經先後去咗土瓜灣綵排。
謝霆鋒、林憶蓮、倫永亮、陳奕迅（Eason）同梁朝偉噚日就去咗綵排，霆鋒會唱《今生今世》、《共同渡過》同埋《當年情》，雖然霆鋒嘅資歷唔係咁深，但今次獲安排演繹哥哥嘅首本名曲，係好難得嘅機會。
噚晚Eason遲大到，所以佢一到就趕入去。倫永亮話會同林憶蓮合唱《當愛已成往事》，而林憶蓮又會獨唱《至少還有你》。
傅珮嘉噚日喺尖沙嘴出席中秋慈善午宴活動，佢話最近得到纖體公司贊助，又話對豐胸好有興趣，佢話：「入行後我由B-cup變A-cup，可以豐胸都好。」有人向傅珮嘉提議，叫佢請教一下胸部時太時細嘅張栢芝，傅珮嘉話：「我估係裝嘅。」但之後佢又即刻打圓場話：「係睇啲雜誌成日教人裝胸作勢，可以變大啲。」
樂壇新人李逸朗早前拍攝新歌《愛上你的愛》MV，唱片公司特意搵咗個面圓眼大，樣貌有啲似Cookies成員Miki嘅女模特兒做主角，可能李逸朗初入行，當要拍佢輕攬女主角條腰同面對面嘅鏡頭嗰陣，佢非常怕醜，重手都震晒咁。乜𠵱家啲後生仔唔係好早熟嘅咩？
無綫劇集《還珠格格III天上人間》因收視欠佳，被調離黃金時段播映，搞到《還III》製作人瓊瑤發火怒轟無綫無情無義，噚日無綫外事部總監曾醒明回應話：「調動係因應觀眾口味而改變，希望瓊瑤明白調動原因同唔會影響日後合作。」無綫話唔想影響合作，係咪驚瓊瑤賣啲劇畀亞視呢？
無綫節目《中華狀元紅國際邀請賽》又再展開爭霸，噚日喺將軍澳電視廣播城進行拜神儀式，今次除咗雲集不同地方嘅精英外，重有藝員隊嘅蔡子健、潘芳芳同蘇玉華，不過佢地三個都對歷史文學認識唔深，潘芳芳重係喺外國留學，所識嘅中文真係有限喎，所以佢哋三人都話：「預咗會獻醜！」
