沙士提早在星洲重現，掀起投資市場恐慌，唔單止港股先升後跌118點，收報11046，連標普期指亦掉頭下跌。本港航空及酒店股首當其衝出現急挫，唔知今次SARS重現，會否將港股CEPA概念一掃而空呢？雖然零售界如Joyce（647）對CEPA及自由行持保守態度，並非一面倒看好，但CEPA確實為投資市場帶來炒作主題，令港股氣氛好轉。
一旦沙士透過自由行再次殺入香港，即使中央即時推出QDII亦好難挺得起香港經濟。但Cookie叫阿虎唔使擔心，歐股及標普期指報跌，主要係驚美國911有事發生，有基金先行減磅，而唔係驚SARS爆發。不過，航空股就最黑，兩件事都有影響，受雙重打擊，國泰（293）、中航興業（1110）、東航（670）及南航（1055）全被拋售，跌幅介乎3-5%。
地產股嘉里（683）與鷹君（041）中期業績都差強人意，分別急挫7.7%及6.5%。市場開始對近期急升的地產股有戒心，新世界（017）被拋售，大跌6.7%，新地（016）亦挫2.1%。黑客話，暫時未知沽盤會否陸續有來，但起碼芬佬暫時唔會再增持。
中小型股方面，先前點石成金嘅VP開始減持獲利，一口氣申報減持冠華（539）448.4萬股、德發（928）6400萬股、六福（590）350萬股。e莉莎話，VP如果減持，通常都一不離二，二不離三，所以大家要小心上述三股。
阿虎