早前，亞Mark曾經同大家提過，話今年底前，德國福士會推出全新第5代Golf車系；據我哋特派記者響法蘭克福車展嘅現場滙報，話部真車樣靚之餘，重好有Golf第1、2代嘅剛勁感，尤其係一對頗有神氣嘅Xenon頭燈，烘托得部車好有一份惡形惡相嘅味道㖭！而據亞Mark打探所得，新款Golf快者都要到明年初夏，方有機會抵港；至於率先推出嘅會係1.6FSI同2.0FSI新型號，前者輸出有110匹，跟現行第4代Golf2.0嘅115匹不遑多讓之外，後者輸出更躍升至150匹咁多㗎！然而，聽聞廠方有意推出2.0FSITurbo嘅高性能GTi版本，單係馬力就經已高達200匹㗎！若然落實的話，重有望響2005年跟廣大車迷見面㖭！還有至頂級嘅GolfR324Motion，大有機會推出兩個版本，當中至Top嘅Turbo版，馬力高達300匹咁厲害。相信新Golf陸續面世，會挽回昔日Golf嘅名聲同銷量呢！