九月一日本欄寫《自助者天助之》，一位讀者來電郵痛罵左丁山不知生活艱苦，不食人間煙火，睇見陳小姐嘅遭遇，就以為好值得同情！呢位讀者自稱月入三千五，與家人始終抱着一分耕耘一分收穫的「平凡理想」。另一位讀者署名「心心不忿的小市民」就支持陳小姐，「小市民」話佢知道好多公屋租戶願意交多啲租，以求調遷大單位或新單位，一啲人嘅租金與入息比例已經超過百分之二十幾，仍然毫無怨言，因為佢哋鍾意住大單位吖嘛！
報紙成日講「公屋租金超過住戶入息中位數百分之十」，實情係應該寫成「公屋租金佔入息比例中位數超過百分之十」（現在嘅比例中位數係百分之十三點八），公屋租金佔住戶入息比例並非不可以超過百分之十，只係呢個比例嘅中位數不可以超過百分之十啫。假如有五個租戶，佢哋嘅租金與入息比例分別係：25%、20%、10%、8%、7%。咁樣，公屋租金佔入息比例嘅中位數就係10%，與法例相符，唔會打官司，不過假如五個租戶嘅排列係25%、20%、13.8%、8%、7%，比例中位數就係13.8%，所以法庭判房屋署輸。
記者寫成「公屋租金超過住戶入息中位數百分之十」，即是講「入息中位數」（假設）係八千，租金不可以多過八百，呢個係錯嘅觀念。英文MedianRent-to-IncomeRatio如果譯為「租金與入息比例的中位數」，而唔係現時嘅「租金與入息比例中位數」，意思會更清楚。記者寫成「租金佔入息中位數」就差之毫釐矣。