飲食人誌：<br>黃金海岸踢拖歎法菜

飲食人誌：
黃金海岸踢拖歎法菜

賞月好地方（三之三）
LeBristol老闆在法國見識過家庭式餐廳，比本地拘謹侷促嘅法國餐廳輕鬆自在得多，故在黃金海岸開設有露天茶座嘅法國飯店，重話：「去完沙灘着短褲拖鞋嚟食法國菜，我哋都一樣招呼。」

記者：馬慶武　攝影：周旭文
Model：Dennis、Joanna（SunSpot）
逢星期一至日出版

係嫦「鵝」而唔係嫦「娥」，因為呢個菜式係以煎鵝肝為重點，大廚Pin話用嘅係法國名牌鵝肝，所以鵝肝表面煎得香之餘，真係做到入口即溶化，正！

番茄、水牛芝士加埋牛油果切片變身「3色圓月」重叠起嚟，夠晒意境優雅，配上略帶酸味嘅紅酒番茄乾汁，清香開胃。

經理Johnny：「唔使多講啦，喺正上方望落去就見到大大個圓月啦。」雖然「行」就「行」咗啲，不過香滑嘅燉蛋加上表面香脆、燒得微焦嘅焦糖，勁正嘅口感同香味又的確係夠吸引。

呢間法國菜最特別之處就係佢嘅環境同氣氛，從露天座位、侍應們嘅服飾、甚至餐廳附近嘅環境中，都可以感覺到輕鬆、Casual。
經理Johnny話：「喺出面啲法國餐廳畀人太高級太拘謹嘅感覺。當然客人有需要時我哋都會即刻過去Serve佢，但係就唔想成日戙喺客人後面睇住佢，最緊要提供一個舒服自在嘅環境。」更強調最緊要食得開心：「對食物有任何要求都可以出聲，就算食物上咗枱，即使唔係我哋有問題都可以換，唔啱換到啱，最緊要出聲。」不過Johnny話開咗舖一個月都未試過有客人對食物唔滿意。

★餐廳背面係LeBristol嘅餅店同甜品店，甜品店除咗有中式甜品外重有數款中式飯供應，而且一樣設有開揚嘅露天座位。

著名法國餐廳孖寶
Johnny同大廚Pin已經合作做法國餐做咗十幾年，之前重一齊效力過喺香港頗有名氣嘅法國餐廳LeFauchon。一個負責管理，一個負責做菜，可謂合作無間，嚟到呢度都繼續異口同聲好似賣樓盤廣告咁話：「環境真係好正，喺正海邊，出面又有個小花園咁，返工壓力都小啲、輕鬆啲、開心啲。而且無咁商業化，菜式嘅價錢Set得抵啲大眾化啲，唔係下下都諗住要賺多啲，舒服好多。」

★Johnny(右)同Pin(左)拍檔咗十幾年，「轉會」LeBristol之後，最享受就係呢度輕鬆自在嘅環境。

中秋應節菜
為了應節，他們嘗試將法國菜中秋化，更重要的是認真背後有一份堅持：「嚟得呢間餐廳，都係想食法國菜啫，所以之前Johnny話要整賞月菜，好似月餅做甜品呢啲花巧嘢我就唔同意喇。」



LeBristol法國飯店
地址：屯門黃金海岸商場地下R5號舖
電話：24309929　營業時間：12:00nn-12:00mn

Dennis：
「呢度環境好浪漫好有Feel，無落雨坐露天位望住個海食法國菜重正。海邊賞月梗係最好啦，不過中秋食法國菜好似唔多襯喎。」

Joanna：
「環境靚，啲法國菜又好味，嚟呢度賞月梗係好啦，就算唔坐露天位，坐屋內窗邊位置一樣可以邊歎冷氣邊賞月。」