沙士噚日在星洲重現，唔單止嚇親小初，連大市亦被嚇親，個別早前備受追捧的股仔，股價回得相當急，雖然話命仔要緊，大家要小心為上，但都唔使搞到咁驚青。
好似傳聞配股多時嘅老牌工業股利民實業（229），噚日朝重好哋哋，股價升過上去2.425元，但臨收市勁回，收2.225元，倒跌3.26%，成交高達1073萬元，連平時捧場嘅證券行，都掉頭掛牌沽出。
收市後，利民公布截至今年6月的中期業績，盈利比去年同期勁升3.2倍，有成2313萬元，兼夾派息4仙，實在唔明白先前點解有人咁緊張沽貨。
經紀黃話，利民由1.50元水平抽上，近幾個星期在2.20-2.30元水平徘徊，聽講有好多獲利盤未有沽出，如果佢哋喺現水平沽出，利潤仍然豐厚，所以噚日有人沽貨其實好正常。
市場傳聞，有證券行原本打算趁利民出完靚靚業績後，落實幫利民批股，但失驚無神俾沙士嚇一嚇，唔知會否受影響。
慕容小初