隔晚美股咁勁，若非星洲發現單沙士病例，港股彈升100點都似，結果急跌118點，「來回」相差二百幾點。星洲股市跌幅唔夠1%，港股跌幅大過星洲少少。
未來幾日，個市都會受星洲沙士事件左右。若再冇新症，則問題唔大。
大藍籌話變就變，中移動（941）早段升上21.50元，擺明炒落後，升45仙，到尾，低收20.65元，反跌50仙。啲Call輪大波動不在話下，最多人買賣嘅9861，最高39仙，低收32仙，波幅超過2成，全日唔見11%。若然低過30仙，可以揸少少博反彈，博星洲再冇沙士事件。
全日最穩定嘅大藍籌係滙豐（005），高低波幅1元，企定喺102元，冇升跌。但隻滙豐Call輪9845，則跌10%，收72仙。咁嘅情形，可能代表滙豐就快回落，亦可代表隻輪抵買。
9845數據，的確唔錯。12月到期，溢價得0.2%，槓桿率14.2倍。
未來兩個幾月，滙豐若然升得10元，隻輪有權大升130%。本來呢個機會唔係冇，只不過沙士事件令個市同滙豐朦朧起來。
新地（016）跌1.25元，新地Put輪9026升12%，收18.4仙，打入龍虎榜。隻輪明年2月到期，溢價20.1%，槓桿率31.4倍。咁嘅溢價，值博率唔高。
滙中龍