青春劇永遠不死！試想多少一級大明星都係靠咁樣「賣春」上位，紅如萬人迷嘅哥哥張國榮、當年學生情人翁靜晶，都係拍青春劇一炮而紅。
就好似嚟緊月中上映嘅《當四葉草碰上劍尖時》，戲未播，已經馬上有人認頭做Fans力撐眾偶像，究竟邊個會成功上位跑出？
最受歡迎頭4名
就《當四葉草碰上劍尖時》幾位靚仔靚女新面孔，記者走上旺角街頭，問吓班街坊嘅意見，睇吓邊位新星會以人氣跑出。
1.女生之冠5票
黃婉伶Race
角色：鄭嘉南
《當》片中女主角，周旋於三男角明追暗戀之中，樣貌未必是人群中最漂亮一個，不過以其秀逸爽朗的氣質，以及平易近人的態度，令不論男、女同感到易於交往。
2.唯一入選男生2票
李逸朗
角色：歐陽樂
劍擊高手，學校超級高材生，為人平易近人，積極追求嘉南，女方亦對他頗為傾心。有一個孖生大佬歐陽逸，同樣暗戀嘉南，成為兄弟間一個問題。
3.靚女黑馬3票
戴夢夢
角色：黃妙兒
劇中鄭嘉南好友，花名大隻妙，小說中出名為食妹一名，志願係食盡天下美食，所以搞校報時，特意為自己開飲食專欄，可以免費食霸王餐。
4.青春劇「老」演員2票
唐詩詠
角色：高晴
嘉南親密死黨，不過暗戀嘉南「男友」Don，使好友關係變成情敵；特殊技能係影相，最鍾意偷拍Don的生活照。
四葉草知多啲
故事原著
呢套會喺嚟緊個星期日首播嘅電視劇，原著出自才女梁芷珊手筆，書名係《當四葉草碰上劍尖》。呢本書係近期熱賣的小說讀物，由7月開賣至今已是第二版。而記者行旺角書店時，亦見多間書店出現斷貨情況。故事講述女主角鄭嘉南，在中六轉校至崇藝私立高校後，結識了三個各具獨特性格的男同學，三人在明中對嘉南展開追求，在暗中又在劍擊學會中以「劍尖」角力。不過嘉南的心意誰屬，則被一件兒時往事所左右，而這更完全左右了她一生的愛情觀。
書名：當四葉草碰上劍尖
作者：梁芷珊
出版社：花千樹出版有限公司
價錢：$50
四葉草由來
其貌不揚嘅四葉草，又叫「幸運草」，而個學名叫苜蓿草，（英文名水蛇春咁長，未能盡錄），原產地喺歐洲，一般幸運草都只係得三塊葉，只有十萬分之一嘅機會可以搵到四塊葉，所以搵到佢已經係一種幸運。幸運草每塊葉都代表住人生夢寐以求嘅四件事，分別係真愛、健康、名譽同埋財富。
想買盆Lucky一番？太子道西嘅園藝街內好多舖頭都話可以作代訂，需時大概一個星期，價錢約在$30或以上，聽街內一舖頭講，早前無綫亦曾在街內訂過一批四葉草，估計都係為拍《當》劇而買。
店名：浪濤花卉盆栽
電話：23997763
地址：九龍太子道西220A號地下
先搶四葉草飾物
根據過往經驗，每次一有偶像劇上，所有有關呢套戲嘅物品都必定會大賣，好似今次呢套戲個名四葉草，相信會掀起一股「四葉草」熱潮，唔想執輸就拿拿臨入定貨啦，但記住正貨產品全部都有證書㗎！
店名：幸運草
電話：35231335
地址：尖沙嘴利時商場1樓134號舖
青春劇倒轉睇
唔好以為青春劇係近十幾二十年先興，其實阿媽年代都已經有唔少勵志同愛情青春劇集，個個主角同𠵱家一樣靠無敵青春殺晒。
《對對糊》
當年亞視都拍過唔少青春愛情劇好似《甜甜廿四味》、《驟雨中的陽光》同《IQ成熟時》，其中《對對糊》都好經典，由當年最出名嘅螢幕情侶─張國榮、倪詩蓓、林國雄、陳秀雯主演，林國雄同陳秀雯後來戲假情真重結埋婚，倪詩蓓息影之後重嫁咗畀漫畫家黃玉郎。
《乘風破浪》
1973年家傳戶曉嘅青春勵志劇，無番三、四十歲都未必有印象，由趙雅芝、程可為、莊文清、楊詩蒂、高妙思全女班孭飛做主角，三十年後除咗趙雅芝重有客串拍吓戲之外，莊文清就走咗去出家，其他女星都不知所終！
《愛情安歌》
當年嘅蔡楓華重好正常，外形官仔骨骨，憑一孖光澤紅唇而獲得「紅唇王子」稱號。喺《愛情安歌》佢同黃造時、區瑞強拍，自己唱埋主題曲，當時hit通街，但可惜今日變得「癲」通街。
《淘氣雙子星》
89年拍，後生極都應該睇過呢套，李克勤同黃貫中飾演兄弟。戲入面重有當時未紅嘅郭富城，又係大配角一名，但又有邊個估到當年呢個高級二打六會變成樂壇天王！
《中四丁班》
九十年代開始，王書麒就係學生天王，青春劇梗有佢份扮學生，《中四丁班》佢擔正做主角，隔籬個大配角就係當年重未紅嘅張衛健。
