影相手機絕對係今年至潮產物，不論大廠細廠都推出旗艦級機種，但觀乎各大廠似乎仍樂此不疲，就算嚟緊嘅新機都繼續大吹影相風氣，不過趨勢就係一面倒玩晒摺機。繼上星期SonyEricsson新機發布後，嚟緊第四季尚有多間大廠嘅手機推出，今日就一齊同大家作一率先預覽。
記者、攝影：劉耀祥
近年埋首於直身機的Motorola，於下半年就轉埋摺機黨堆，一口氣公布3款V系列摺機，當中以V600大佬功能至強，外形以黑、銀為主，已經相當CyberLook，兼且大玩冷光閃燈，用家可以自行設定不同來電者的閃燈方式及顏色，比快閃黨更加閃。內置藍芽、GPRS、和弦、Java及MMS，已經十分「齊料」，唯一要彈就係冇外芒，自拍有點難度。
今年係影相摺機嘅天下，向來都主力生產摺機嘅三星當然最開心，雖然早前開始有直身機面世，不過三星始終鍾情於摺機，預計今年底推出的三部新機全屬摺機，其中高階機種E700就打破以往三星機風格，全黑機身，鏡頭亦都唔再玩扭擰，配上反白外芒，亦都係嚟緊雙彩芒大熱配備。不過功能方面就未見大突破，繼續MMS、GPRS、Java及WAP，想玩藍芽又或者拍片嘅三星Fans就要再等等。
響電視廣告成日見到周杰倫拎住係咁影相，就係呢部PanasonicX70，被譽為GD88後繼機種的X70，內涵就大幅加強。影相鏡頭當然唔少得，兼且更內置閃光燈，黑麻麻都一樣影到相。而內置藍芽功能對PDA用家更加方便，支援MMS及Java，可惜只有16和弦就似乎較遜色。
面對影相狂潮，西門子上半年似乎較落後，到現時仍未有內置的影相手機見街，不過嚟緊就會有呢部ST55，外形較為硬朗，相信適合男性用家。內置30萬像素鏡頭，最高可拍攝640×480像素照片，除可以影相之外亦可以拍攝MPEG4短片，所以理所當然有埋MMS及GPRS功能，加埋支援Java，唔影相都可以Download大量JavaGame慢慢玩。
Nokia下半年新機最事先張揚當然係N-Gage，已經有多間著名遊戲商為其開發遊戲，而且本身功能亦相當強橫，支援多種音效格式播放，聽MP3播Midi同WAV都冇問題，強攻年輕遊戲玩家。而採用SymbianOS的6600亦預計今年底推出，最緊要係首次配備65,536色彩芒，加上強勁功能如內置鏡頭拍短片兼影相、GPRS、藍芽、24和弦等，效果自然更加令人期待。
