港股進入調整期，股市下跌成交縮減，但噚日仍有逾百億元成交，恒指調整幅度唔大，早市跌唔夠100點就俾美資托住，跌幅收窄至只有5點，收報11165點，成交114.42億元。黑客話，咁係反映港股承接力好強，阿虎都舉腳贊同。
在調整市當中，游資重有興趣追隻大落後嘅電盈（008），搞到電盈急升5.4%，收4.85元，成交高達7.12億，重勁過滙豐（005）少少。
港基銀行（636）噚日停牌，台資富邦宣布以每股3.68元提出全購，較停牌前溢價僅6.67%，亦較傳聞中的收購價每股4元為低，相信港基今日復牌，股價難望大躍進，而其他小型銀行股噚日亦見偷步，但升得唔多，廖銀（1111）升1.7%，收11.90元；持有港基20%股權的光大控股（165）亦只係微升1.8%，收4.20元，成交3263萬元。
光控若接受富邦收購港基，即可套現逾8.6億元，相當於每股可套現0.55元，對光控而言，唔算好有刺激性。事實上今次收購價僅1.16倍帳面值，反映買家出手相當審慎，現時大市出現技術性調整，中小銀行股唔易借勢造好。
中意控股（1198）噚日中途停牌，等待公布成交量大增嘅原因，停牌前報2.425元，冇起跌，成交則高達3372萬元。隻股咁大成交，主要有兩宗大手成交上板，每宗750萬股，每股作價2.18元。唔使問阿貴都係有主要股東配股。e莉莎話，聽講接貨者實力平平，炒唔炒得起都成疑。
阿虎