由長實同新地合作發展嘅長沙灣宇晴軒，開售日期重未定，但宣傳攻勢浪接浪，噚日由長實高級營業經理郭子威率先介紹，專為兒童而設嘅「智龍兒童王國」會所。
會所有五千呎，耗資二千萬，以恐龍為主題，郭子威講，意念嚟自一系列恐龍為主題嘅電影，會所有多項設施，包括一個有三千本圖書同多部電腦，了解恐龍歷史嘅「學之坊」；重有模擬史前恐龍生活環境嘅大型立體遊樂組件，畀小孩探索恐龍進化嘅「龍之子」；會所重有特別畀小朋友打籃球、健身、保齡等運動嘅「龍之堡」；另外「藝之谷」內有唔同樂器，啟發孩童表演天份。
除為兒童特製會所設施，發展商同天平珠心算、禧文學舍，及曾福琴行，簽訂合作協議，為宇晴軒未來嘅小住客，定期安排文、理、數、樂，四方面課程，大打兒童牌！
薄扶林貝沙灣第二期價錢及賣樓細節重未公布，但電盈已低調賣咗成一百間，認真唔嘢小。
呢個矚目豪宅，令代理賺唔少，當中最肥仔嘅，首推中原嘅簡汝明，隸屬輝煌臺分行，喺貝沙灣第一期做咗單全行單一金額最高嘅成交，係第七座巨無霸複式，成交價三千一百萬，佣金自然和味。
中原就送佢金鐘港麗酒店總統套房一晚住宿，以作獎勵，要成三萬蚊晚㗎。噚日就情商間房嚟開記者會，蘭西都有機會一睹間房嘅豪華。
香港物流業發展話題方興未艾，跨國公司仲量聯行嘅成員公司LaSalleInvestmentManagement，宣布投資物流業嘅新舉動，不過，唔係喺香港或內地，而係日本東京嘅江東區，收購位於若洲嘅一幅地皮，面積超過十三萬呎，興建物流設施，建築面積超過二十七萬呎，預算明年3月落成，將租予當地物流公司，固定租約為期二十年。點解揀日本？佢地認為日本倉庫物業市場未充份開發，投資有得諗。
發展香港陽明山莊的台資僑福集團，近年轉戰英國，蘭西噚日睇英國《金融時報》，赫見僑福掌舵人黃建華接受訪問，大談在泰晤士河畔的BatterswaPowerStation地皮發展大計。個地盤係黃家十年前買下，一直盤算如何發展，設計到今日才曝光。
黃建華話，呢個價值八億英鎊（一百億港元）的項目，明年將開始動工，日後是倫敦南區的一級豪宅，包括頂層有一所五十間房的酒店，全部可遠眺泰晤士河全景，頂樓更有一間玻璃屋，內有張十二座位圓桌，專供豪客欣賞倫敦全景。此外，佢重想搞水上的士服務，果然係豪氣之舉。
以環保樓做賣點嘅鰂魚涌逸樺園，噚日終於有機會參觀現樓，唔使紙上談兵。第一座嘅電梯大堂，用大量落地玻璃，目的係多利用天然光，慳番啲電費，現場所見，雖然燈光比較暗，但依然好光猛，重可以望到山景，聽講太古嘅外籍高層重好鍾意個山景㖭。
另外，每層嘅電梯大堂，兩端都有窗口，有通風作用，唔似得𠵱家好多新樓咁，成條走廊密封，又冇空調，等𨋢時焗餐死。
置邦物業為加強高層同前線員工及客戶嘅溝通，最近增加董事巡察次數，加強了解前線員工同客戶嘅需要，增強溝通同提高管理效益。
另外，置邦最近又簽署「職業衞生約章」，會喺工作環境清潔、清除積水、廢物處理、控制害蟲同維修及監察機制等方面，達到約章嘅要求。睇嚟物業管理公司正不斷提高管理質素，對客戶嚟講都係好消息嘅。
蘭西
電郵地址：
