水果入饌，睇落醒神，食落又易入口，在悶熱天時總是叫好叫座。來到炎夏季尾，有商場作最後一擊，聯同幾間食肆推出夏日水果菜。目的不止消暑，大廚更精心炮製了兼具養顏及營養價值的食譜來。想歎消暑的菜，即刻跟大廚學吓嘢。
記者：吳佩璇 攝影：周旭文
模特兒：Ice、Jenny（SunSpot）
示範：聯邦大酒樓廚部主管黎錦倫師傅（26260011）
許多時水果做菜，都只屬伴碟配角而已。但一來到夏天，水果便成了菜單上的主角！而鑽石山的荷里活廣場，就趁季尾來最後一擊，集商場內的聯邦大酒樓、聯邦海鮮酒家、聘珍樓及泰棧泰國料理幾間食肆，齊齊推出不同主題的特色生果菜。
講到自己煮，聯邦大酒樓廚部主管黎錦倫師傅教路，因為生果本身味甜，一般的調味如雞粉可以省卻，至於糖亦可免，反而可以加點鹽。要將生果餸的鮮味發揮出來，加醋更佳。另外，生果煮時亦切忌過火，煮得太熟太腍都會令生果失去本來的味道和營養。
火龍果脆牛柳條
火龍果易溶，一般多作伴碟用。但黎師傅不甘平凡，先將火龍果肉起出來，切片釀回火龍果殼中，然後再利用火龍果配橙汁，調配出創新的火龍果汁來點牛柳吃。火龍果形象正氣，含維他命B1、B2、B3及C、胡蘿蔔素、鈣、磷、鐵等，食得多人都靚啲！用來配牛柳，黎師傅認為將是最夾的。
用咩料：
火龍果 2個
牛柳 8両
生菜片 1片
鮮橙 1個
椰盅咖喱海中寶
黎師傅有見海南口味每逢夏天必大收旺場，而咖喱亦能增進食慾，於是便以最正宗的方法，炮製海南咖喱，取材椰盅。為兼顧賣相和食味，沒有刮起椰肉來入饌。但另方面又要煮出椰香，故黎師傅多番強調要用新鮮椰汁來做這道菜。而椰肉有補陽火及強身健體的作用，最適合身體虛弱、容易疲倦的人，對寒咳患者亦有止咳化痰之效。
用咩料：
椰盅 1個
蝦 2両
鮮魷 2両
帶子 2両
斑肉 4両
馬鈴薯 1個
青椒 1個
紅椒 3隻
洋葱 半個
咖喱材料：
咖喱粉 1両
黃薑粉 少許
鮮椰汁 4両
上湯 2両
香葉 2片
調味：
鹽 2茶匙
糖 2茶匙
雞粉 1茶匙
