蘇永康和鄭中基（Ronald）前晚錄影《超級紅人館》，大耍雙截棍，康仔惟恐木棍會擊中重要部位，只輕輕亂搖便了事，反而Ronald放膽地大耍一番，又以大髀夾木棍，毫無懼色，十分搞笑。
蘇永康和鄭中基前晚在將軍澳電視廣播城錄影《超級紅人館》節目，二人與現場觀眾大玩遊戲，又分別耍雙截棍及扮Ronald在新戲《龍咁威2003》中唱陳百強《漣漪》一曲。
當Ronald與康仔一同大耍雙截棍時，只見康仔小心翼翼地拿着棍左右搖晃，即使最後有個動作要用腳夾着雙截棍，他都只以膝蓋輕輕碰一碰便算，惟恐會撞擊到重要部位。反觀一向視李小龍為偶像的鄭中基，則放膽地將雙截棍不停搖動，最後又以大髀夾着木棍，加上生鬼表情，十分搞笑。
而前日是該節目主持蔡立生日，康仔亦將於本月二十四日生日，故前晚兩人特地切蛋糕慶祝。提到梅艷芳因甩髮要戴假髮傳言，康仔說：「佢啲頭髮假㗎咩？係咪顏色問題呀？𠵱家興實色嘛。」至於阿梅帶病拍戲及開個唱，康仔說：「佢自己有分數啦，佢行得走得，彈吓彈吓咁。」他又謂中秋欲與阿梅、張衞健及梁漢文等一班好友度過。
至於Ronald對於有雜誌拍得楊千嬅當眾拉扯胸圍一事，他說：「佢插咪啫，一睇就知呀，我都試過。」千嬅多次被拍得失儀動作，Ronald說：「有時啲嘢急都冇辦法，我喺美國時試過去廁所冇廁紙要用襪啦，所以𠵱家一定會着襪，撩牙都好小事啫。」
此外，Ronald昨日到商台接受訪問，對《龍咁威2003》已衝破千五萬票房，感到高興，他透露有六部片約在斟洽中。
採訪：陳梅香、李珮洳
攝影：陳偉權
