過去六年，阿娣一直走着一條艱苦的單親路，剛獲派公屋的她，期望從此開展新生活。「派到公屋，梗係開心啦，起碼以後唔使再捱貴租，不過，收到房署通知信之後，我又晚晚瞓唔着，好驚應付唔到今次咁大筆搬遷費。」
四十二歲的阿娣，經歷過一段不如意的婚姻，拖拖拉拉多年，夫妻最終於九七年協議離婚，阿娣獨力撫養一對現年分別十五歲及九歲的兒子。「當初真係好痛苦，甚至想過攬住對仔一齊死，不過最後都係做唔出。」說起坎坷往事，阿娣涕淚漣漣。
阿娣婚後一直當速遞員幫補家計，惟誕下幼子不久，便面對離婚的衝擊，由於兩稚子乏人照顧，阿娣惟有辭去工作，近年靠綜援金生活，日子清貧刻苦。「自從減咗綜援之後，我哋三仔乸嘅生活真係好困難，因為租金津貼少咗，所以每個月都迫住要喺生活費度補貼七百蚊出嚟交租，搞到啲錢銀成日都好繃繃緊。」
輪候公屋多年的阿娣，本月初收到房屋署通知，獲配一個位於新市鎮的公屋單位，對於三母子來說，這消息來得好比中了六合彩般高興，可是興奮過後，阿娣卻要四出張羅一筆搬遷費。「新屋淨係交上期按金已經要四千幾蚊，重未計接駁水、電、煤氣、電話嘅費用，另外，簡簡單單如拉電線都要錢，唔知點算。」
按照現行社會福利署政策，只有領取綜援的長者及傷殘人士，才會獲發搬遷津貼，阿娣這類單親家庭，需自行想辦法。蘋果日報慈善基金有見阿娣的困難，即時撥款一萬二千元予她，助其應付新居搬遷開支。此外，阿娣亦欠缺一部洗衣機及煤氣煮食爐，盼獲善長捐贈。 捐款編號：C1101
暖流熱線
電話:29908688
傳真:23702192
電郵:
網址：