早前預告過楊鐵樑下周一起喺港台教英文，噚日八方聽佢錄音，佢非常好狀態，一take搞掂。
楊官話學英文最基本係人哋知你講緊乜，你又知道人哋講乜；高一層就係文法正確，發音正確；再高啲，就係講話中加插啲典雅字句，例如成語同外語，好似法文。
佢都知語文急唔嚟，𠵱家啲後生仔太多嘢玩，好難叫佢哋坐低正正經經睇本英文書，加上香港人好多連26個英文字母都讀得唔準確，l同n都唔用心去讀好，好難有進步。
但係香港作為一個國際城市，英文始終好重要，楊官希望可以耳濡目染吓大家。如果食飽，應該講「Thankyou,Ihavehadplenty.Ican'teatanymore.」千祈唔好講「Ihavehadenough」，因為呢句話有啲唔客氣，即係話「我受夠啦。」
楊官順帶講吓禮儀，佢好幽默咁話，坐喺餐桌前，最高境界係發生乜嘢事都要若無其事，面不改容，就算係有人倒瀉晒杯酒，有人忍唔住放屁，都適用。英國紳士重會認埋個屁係自己放嘅，等啲女士唔會尷尬㖭。
上完堂，八方問楊官點睇香港，佢話7.1令佢好感動，因為香港人好理性，佢重承認行會當年太脫離群眾，冇危機感，亦掌握唔到市民大眾嘅脈搏，至於一人一票選特首，佢話早就應該有，但係點選就值得坐低慢慢研究。
傳真︰2623-9278
電郵︰