澳洲女歌手KylieMinogue喺英國嘅人氣有幾勁就唔使多講，總之推出佢嘅產品就一定唔使蝕錢。好似名人月曆公司Danilo推出嘅Kylie月曆，咁多年嚟已經賣咗超過七十五萬個，重成為月曆銷售量最高嘅女星，相信加埋Kylie出年嘅月曆，銷量肯定過一百萬。
其實喺Kylie未鹹魚翻生前，九十年代中後期雄霸英國樂壇嘅SpiceGirls一直係月曆最好賣嘅藝人，可惜近年已經俾Kylie追過，不過月曆總銷售量仍然位列女星第二。而排第三至第五位嘅分別係麥當娜（Madonna）、歌地亞雪花（ClaudiaSchiffer）同BritneySpears。
不過即使Kylie嘅月曆有幾好賣，相比男星仍然有一段距離，原來金童子奇里夫李察（CliffRichard）係英國歷來賣得最多月曆嘅名男，銷量超過一百五十萬個。而萬人迷碧咸（DavidBeckham）則屈居第二，貓王皮禮士利（ElvisPresley）、RobbieWilliams同佐治米高（GeorgeMichael）就分列三至五位。
講開Kylie，最近有報道指佢嘅司機因為趕住去機場接佢同男友奧利華馬天尼斯（OlivierMartinez），架車開到接近二百公里，結果俾警察捉到正，所以Kylie喺法國度假期間都係由奧利華做柴可夫。