蒲師傅曾於半島酒店、皇家遊艇會及馬車會做總廚，連彭定康、陳方安生都是他的Fans。風光了二十幾年，今年一句「好悶」，就花3小時來回，跑到這打風就冇工開的鄉下地，親身「下海」（養魚池）揀魚、落田收割，晚晚望住頭頂月光諗五星級酒店新菜，最終還是益了我們這班中秋食客。
記者：陳慧敏
攝影：周旭文
當初以為蒲師傅辭官歸田，背後必有段轟轟烈烈的感人故事，然而他的回答只是：「悶囉！」「以前邊有咁自由？廚房訂咩菜你就用，主管話咩菜你就煮，客人咩反應你都唔知。喺呢度，有成個農場畀你做後盾，我朝朝自己落田揀材料同捉魚，嗰日白菜靚就摘白菜、莧菜好就摘莧菜，返到嚟先諗可以做啲乜。」農場跟餐廳只係相差15分鐘路程，材料保證無農藥無化肥，運送時間比某超市之王更快，完全是酒店都吃不到的田園風味！
除此之外，蒲師傅最喜歡跟客人來個親密接觸，「啲客會同我哋講吓佢哋嘅煮嘢心得，開心好多又學多好多！我哋嘅薑汁豆漿，都係個客提議我哋做嘅，8成客人都會點嚟飲，飲完重要添飲㖭！」然後急急腳弄了兩杯給小記飲，果然夠辣！講到最新挑戰菜有機乳酪，廚房樓面連老細林先生都七嘴八舌，一陣話鍾意士多啤梨，一陣又話農場啲粟米夠鮮味，試新菜，絕對是他們最愛嘅玩意。
初見蒲師傅，見他外表嚴肅，甚有「大」師傅格，但原來他年輕時熱愛足球，踢「碧咸個位」的他非常有性格且貪玩，由電話訪問起已經堅持喺記者個名後面加個「姐」字，鬧極都唔改；喜歡你叫他花名「葡萄糖」，你叫他一聲「糖哥」他更笑彎了腰。據可靠消息稱，曾有員工在跟他玩鬧後，遭受鮮忌廉攻擊。兇徒摸住足球咁大嘅肚腩笑謂：「玩吓先開心㗎嘛！」
摷勻都唔見芒果嘅？原來喺個沙律汁度。用芒果茸、橄欖油、有機醋、黑椒、芥末等特製的沙律汁有好香芒果同香草味，除了兩隻粗過手指公嘅鮮大蝦，秀珍菇、紅葉生菜同香葉都係喺對面農場摘過來的有機菜，特別新鮮爽甜。
名震大埔水晶𩶘魚，日賣30條，因為喺淡水魚池慢慢注入鹹水飼養3個月，吃的又是有機魚糧，銀白色的水晶𩶘魚比一般淡水魚還要彈牙夾鮮甜，卻沒有鹹水魚的腥味。佳節當前，體貼的「葡萄糖」更將鹽焗𩶘魚改成清蒸𩶘魚，淋上以燈籠椒、欖油、西芹跟香檳白汁炒成的汁料，健康得來又可平衡吓節日時的「暴飲暴食」，連不愛吃魚的攝影師都默默將之掃清。
來自美國的有骨西冷，煎完再焗可以保留牛肉原味。加上由農場即摘即用的香草、碎胡椒和粗鹽，無用醃料個味都好Sharp！
用甘笋、西芹、香葉加魚骨等熬2-3小時做湯底，才加忌廉、魚翅、火腿絲和生菜焗，猶如西式老火湯，所以特別鮮甜。
可謂鎮店之寶的芝士餅，將五星級酒店的製法搬到農莊，但用料更講究更健康，味道比一般芝士餅清淡，星期日閒閒哋賣掉10磅！
John：我哋第三次嚟食啦，今次點咗個羊馬鞍都幾好食。最欣賞呢度啲嘢冇加味精，夠原味同健康。
Jemi：呢度無論蔬菜或者肉類都煮得唔錯，可以迎合吓我哋周時變嘅口味嘛。
除了有機嘗賞月菜外，一家大細還可以到離餐廳15分鐘路程的「環保農莊」，餵餵月兔、執吓海星、餵鸚鵡，甚至親手拔出新鮮芋頭、採香葉、莧菜、南瓜及勝瓜，交給廚房為你做賞月菜，更可以預訂遊艇出海賞月，玩足一日！
環保農莊餐廳
地址：新界大埔汀角路大尾篤村61號A地下
電話：26626109
營業時間：
星期一至五10:00am至10:00pm
星期六、日及公眾假期10:00am至11:00pm
參觀農場收費：每位$15須電話預約。
交通：大埔墟火車站小巴20C或巴士75K至總站，約35分鐘。
泊車：大尾篤村咪表。