港股昨日低開高收已在預期之內，只是估不到好友可以幾乎收回全部失地，恒指早市最多跌過94點，收市則微跌5點，報11165。
前日曾提過美股未跌穿20日線仍強勢未改，昨日所見好友亦係未驚過，不過可抽上的棋子確係愈來愈少。滙豐（005）終於開車，早市雖曾低見100.50元，但午市配合瑞銀調高投資評級至「買入」，目標價上調至9.5鎊（約117.80港元），彈回102元收市，倒升0.50元。
滙豐係好友最後王牌，現時動用並不出奇，但連電盈（008）亦挾上，則令人覺得好友無兵可用，電盈昨大升5.4%，收4.85元。以勢論勢，股價若能守穩4.60元，短期可見5-5.20元。若論基本因素，則主業固網前景存隱憂，有減價壓力，地產貢獻暫時言之過早，加上沿路蟹貨重重，並不值得憧憬，向壞方面諗，更可能係港股真正的「藍燈籠」。
滙豐昨日雖有挾上之勢，但始終牽掛美股周一晚走勢，怕杜指昨晚再以陰燭插穿20日線，今日港股連本帶利歸還，跌番夠本，所以未有按前日部署，追入滙豐Call輪9845，若美股無恙，滙豐又升穿102.50元頂部阻力，才考慮買入第1注。
9月12日星期五為中秋假期，散戶須提防多一樣事情，就是長假前出現獲利回吐，加上當晚美股是911兩周年紀念的敏感日子，今個星期趙飛雲採取保守策略，就係少做少錯，若見形勢不對則跳車鬆人。
趙飛雲