古天樂喺自己官方網頁入面嘅《古仔週記》透露呢排因感冒菌入咗眼，搞到對眼又紅又腫，呢個禮拜係咁斷斷續續發高燒，𠵱家所有工作都要停晒。噚日馮仁昭聯絡過古仔，了解吓佢嘅病情，古仔話：「呢輪啲流行性感冒菌好勁，上個禮拜我喺一個公眾浴池拍完戲即刻領嘢，跟住係咁發燒，成個人軟晒。」
古仔媽咪原本想安排佢入院，但醫生話唔使入住，可以觀察吓先至再作決定。古仔話：「𠵱家所有工作都停晒，靜心喺屋企休息，其實今日精神已經好咗啲，早幾日隻眼腫到好似隻熊貓咁，不過我諗再休息幾日應該冇事，而過幾日我重會去新加坡做演唱會㖭。」
上山詩鈉噚日三點左右同埋一個女性朋友繼續風雨不改咁，去到大欖女子懲教所，探望佢嘅朋友關秀媚。佢哋逗留咗一個鐘頭之後就離開，但係上山詩鈉對於記者嘅問題，全部耍手擰頭唔答，反而佢身邊個女性朋友就話畀班記者聽，指關秀媚冇乜特別喎。
張學友噚日去咗土瓜灣為張國榮紀念音樂會錄音，佢俾人問到之前新加坡傳媒話佢，喺新加坡頒獎禮嘅時候心事重重咁，唔知係因為擔心阿梅定係怕自己事業開始走下坡，學友好淡定咁話：「走下坡都唔係𠵱家啦！呢個時候就一定會發生，冇人會紅一世，所以我冇擔心過，更何況我𠵱家由山腳從頭開始，點走下坡。」
鍾麗淇、陳霽平噚日喺尖沙嘴出席「Toplux光彩無限首影禮」活動，收到大會送嘅手提電話。鍾麗淇話以前都收過產品商送嘅手機，不過有次喺餐廳食飯，唔夠五分鐘就俾人偷咗，所以𠵱家就算收到最新款手機都唔敢用住，因為新機炒得貴驚易俾人偷。
