港股急升4個幾月之後，自然有人覺得升勢過速，要先回一回氣，昨日「徇眾要求」，稍作調整，恒指一度回落93點，但守穩萬一大關，收市時只係微跌5點。
電盈（008）炒落後，收4.85元，升25仙，槓桿率愈大嘅Call輪，升幅愈大。昨日再推介嘅9791，升16%，拍唔住9766、9864、9875、9762等，呢4件升幅最大52%，最小都有27%。
今日推介和黃Call輪。7月中至8月初，長實（001）與和黃（013）同價，𠵱家長實做63.25元，和黃58.75元，相差4.50元，係時候由和黃迎頭趕上去。揀和黃Call輪，唔嫌交投麻麻，9757可以先行考慮，隻輪明年3月到期，輪價93仙，溢價2.4%，槓桿率6.3倍，溢價低而槓桿率唔弱。想交投活啲，則揀9914，明年1月到期，輪價63仙，槓桿率9.3倍，要畀高啲溢價，4.3%。
中海油（883）半年成績表出色，本來對股價有利，但因買咗少少同核心業務冇直接關係嘅資產，市場唔啱聽，股價回落50仙，收14.05元。呢種不利反應，相信好快成為過去，股價大有機會彈番上去，可趁低收集Call輪，對象係9535，12月到期，輪價38仙，負溢價0.5%，槓桿率3.7倍。
章盛