前日展開嘅意乙聯可謂一團糟，響杯葛氣氛籠罩底下，十二場波得兩場開到波，而各地球迷鬧事情況極嚴重，凸顯意大利足球嘅黑暗面。
雖然意大利聯賽會警告邊隊罷踢就當輸○比三，但其中十六隊波話唔踢就唔踢，得卡坦尼亞對卡利亞里同埋拿玻里對科木兩場踢得成。唔止咁，各地球迷賽前不斷搞事，發生唔少襲擊防暴警察同埋破壞公物事件，至於作客拖連奴嘅沙蘭力坦拿就響酒店被主隊球迷包圍，幾經辛苦突圍去到迪爾艾比球場，至發現對方無派隊，摸門釘。梳打埠大莊已經列咗禮拜四意乙賽序，但踢唔踢得成，開唔開到盤就重未知。
唯一安慰係無論喺意大利同埋本港都有唔少球迷嘅蘇拿有波入，協助卡利亞里贏卡坦尼亞三比○。
上個禮拜提過博洛尼亞想簽嘅艾迪亞，最終加盟意乙熱拿亞。據講，雖然博洛尼亞肯順佢意，對羅馬時唔使佢對番前屬球會，但佢始終難忘羅馬恩情——上季尾試過畀佢射十二碼等佢過入波癮（雖然唔入），又幫佢搞告別騷，實在唔想響同一級別聯賽侍從兩主，有情有義。
據報話羅馬想同後衞薛比拿續長約到二○○八年。呢個後衞水準不穩，同球迷嘅關係極差，試過場外遇襲，而喺場內就成日俾人噓，羅馬肯出長約利誘，無非怕佢出年約滿恢復自由身，到時渣都冇，而且隊波真係唔多夠後衞使。不過聽聞薛比拿唔多肯制，睇怕羅馬會人財盡失囉。
澳洲龍門保斯尼治最近事業愛情兩失意，唔單止為服禁藥一事上訴焦咗，連同居女友莎拉早排亦捨佢而去，可謂衰到貼。就響佢呢個咁失意嘅時候，莎拉早幾日至發現有咗，正諗緊要唔要呢個BB。即管睇吓呢次「意外」，唔會唔令呢段情出現轉機，等保斯尼治有番啲人生希望啦。
前伯明翰射手賀斯菲特可謂當年球隊升上超聯嘅功臣，上季對維拉嘅中部打吡亦係入波英雄。但伯明翰似乎唔多領佢情，重愈簽愈多前鋒。幸好三十歲嘅佢，剛剛終以一百萬鎊轉會費過檔韋根，有一筆簽紙費收番，都算有番個安慰獎，好過好多人，包括隊中另一大後備約翰囉！