經紀陳噚日神神秘秘同小初講，問記唔記得早幾個月前建美集團（851）玩大插水時，有隻叫上海銘源（233）嘅股仔跟埋一齊勁跌，但唔夠幾日就三扒兩撥抽番上去。市場傳聞銘源將有動作，可以留意。
小初當然記得，銘源前身係星島，上海大股東買殼已經成年，但一直唔見有搞作，成交亦轉為淡靜。
早前股價曾單日勁跌7成至0.06元，但無耐已經抽番上去，而且重升突，噚日再升5.26%，收0.40元，貼近一年高位。事件反映一件事，就係銘源街貨非常集中，所以跌得急時亦升得快。
經紀陳話，銘源在5月份收購生物科技公司，作價4500萬元，發行2.25億新股支付。呢批貨剛好唔夠10%，重要由兩位仁兄分別持有，所以沽咗貨都未必有人知。
不過，銘源自從購入新業務後，要開車亦多個理由，隻股貨源集中，兼且傳出有炒家埋位，所以真係炒得成亦唔出奇，小初唔敢睇小佢。
慕容小初