人人估調整，但大市承接力好強，埋單僅微跌5點，成交減至114億元。大市升浪應未完，連升4日後，回一回，更為健康。國企股以重鋼（1053）最靚，升0.1元，重上3.0元水平；中石油（857）平收2.775元，呢隻股基金已上晒手，遲早升上3字頭。
講完個市，喺度講聲對唔住，噚日廣南（1203）篇稿，計數時數錯一個位，每股實際資產淨值應為5.5仙。不過，有8成盈利來自工業項目的公司，股價升唔升，最緊要有盈利支持，廣南將於下周一（15日）宣布中期，若業績對辦，而全年計預測PE約在10倍水平，應該揸得過。以走勢計，噚日破位後，中期仍可以0.23元為目標。
中國挺港招數陸續有來，繼自由行准許攜帶外幣加碼2.5倍後，又有消息指攜帶人民幣上限亦放寬，由6000元加到2萬元。錢愈來愈多，一眾零售股立即有反應，升幅最大係Joyce（647），升12.6%，其他如六福（590）、莎莎（178）、卓悅（653）同恒豐金（870），都有3至9個位進帳。十一黃金周勢掀起香港遊同自由行熱潮，唔排除零售股會趁機炒多轉。
除自由行「放水」外，准許內地人投資移民香港亦勢在必行，現時自由行已振興本港經濟，間接帶旺樓市，有沙田大屋苑的樓價，近日已由低位上升15%。投資移民政策吸引內地人在港置業，以650萬元資產下限計，豪宅將率先受惠。
樓市轉旺，成交增加，地產代理業務近期明顯好轉，日後內地投資移民拍板，生意又會做唔切。美聯物業（1200）在內地有分行網，今後可以為內地人在港置業擔當重要的橋樑角色。美聯已預計二手成交量將回升至每月5000宗（今年初僅得2000宗），在成交增加的支持下，樓價將向好發展。
美聯02年度（12月年結）虧損7882萬元，主要係為物業重估虧損逾億元，今年上半年差，下半年好，相信全年已可轉盈，至於04年，情況將更樂觀，PE可見番單位數。受樓市好轉刺激，美聯近期股價由0.93元升上1.25元，形成旗形，噚日高見1.27元，已有突破之勢，升勢一確認，目標指向1.57元。
郭兆誠