謝霆鋒本來大前日要去台灣錄音，但因為契姐梅艷芳當日開記者會交代癌病情況，佢為咗要支持契姐就延遲赴台，到前日先去台灣，前晚就約埋喺台灣宣傳嘅莫文蔚一齊食飯。
前晚大約十點幾，霆鋒同莫文蔚喺台北安和路嘅「新都里餐廳」行出嚟，佢哋分開坐車走，霆鋒拍一拍莫文蔚嘅手臂，然後目送佢上車離開，之後佢就搭車返酒店。
霆鋒近排幫莫文蔚寫咗首歌，搵咗林夕填詞，叫做《看透》，原來呢首歌係霆鋒之前由拘留所釋放後作嘅第一首作品，佢將首歌畀咗好朋友馮德倫嘅女友莫文蔚唱，霆鋒話：「呢首歌係最近幫朋友寫嘅歌當中，最好嘅一首。」
關心妍噚日喺馬鞍山出席活動，佢話自己前晚返到屋企，因為廁所個鎖壞咗，佢喺裏邊叫天不應，叫地不聞，又唔想驚動阿媽，所以要留喺廁所過咗成晚，關心妍重話呢件事令佢諗到要喺成屋周圍放零食。聽完佢咁講，馮仁昭就覺得關心妍間屋應該有成萬呎咁大，如果唔係，佢又點會叫極都冇人聽到喎？
陳慧嫻同Boy'Z等噚日去紅館出席一個名人排球賽，慧嫻為比賽主持開球禮，點知佢一開波就撻Q，搞到鬼咁尷尬，惟有以笑遮醜，而比賽最後由歌星隊以23比22勝出。
慧嫻話男朋友呢幾個月都有投訴佢肥咗，所以佢要的起心肝減肥，不過佢話唔擔心減到連個胸都細埋，因為一直都唔會有人留意佢嘅身材喎。
馬來西亞拿督斯里林敬益細女林佩晶日前出嫁，楊紫瓊特別飛過去出席婚宴。楊紫瓊嘅屋企同林家關係好好，所以佢同媽咪一齊去。當大馬記者訪問楊紫瓊時，佢好有禮貌咁拒絕，話唔想搶主人家嘅風頭，莫非佢驚人問佢套《飛鷹女俠》欠薪嘅事？
劉松仁同楊思琦一班演員噚日喺尖沙嘴宣傳新劇《英雄、刀、少年》，由於《還珠格格Ⅲ天上人間》收視插水，被迫更改時段播出，令《英》劇可以喺今晚八點播出，思琦話：「呢啲係公司嘅決定，我自己都冇諗過會咁早出街，可能公司對套劇有信心。」
問劉松仁對新劇有乜期望，佢話：「我向來都唔睇收視，總之我做好自己就夠，不過呢套劇可以咁快播，真係要多謝《還珠格格》。」
