與梅艷芳交情不俗的何超瓊及陳加玲，前晚出席Loewe派對時，對阿梅的病況均大表關心。
陳加玲對於阿梅患癌一事說：「希望阿梅可以樂觀面對，因為病人係好受情緒影響嘅，所以凡事都要睇開啲、樂觀啲。如果有機會嘅話，我會勸阿梅食素，有報告證明食素比食肉嘅人患癌症嘅機會係低七成嘅，我覺得就算阿梅𠵱家先開始食素，對佢個病都有幫助。」
何超瓊則說：「我未打電話畀阿梅，我相信佢一向做嘢有自己原則，大家應該畀少啲壓力佢，等佢慢慢康復。佢嘅病我事前一啲都唔知，有次約佢，佢重失約㖭，嗰時都唔知乜事。」
問何超瓊兩個好友、張國榮的去世與阿梅患癌症，會否影響她的心情？她說：「就係咁，人一定要將自己嘅壓力想辦法紓緩，最緊要係要早啲治理，不過阿梅係一個唔鍾意麻煩人嘅人，喺呢方面有啲執着，佢連佢媽咪都唔講。」
採訪：林妙萍
攝影：甄朝健