爆機狂迷：
《高達：宇宙相逢篇》特別版炒上二千

早兩日全球機迷朝思夜盼嘅《高達：宇宙相逢篇》終於到貨，特別版極少量，俾人搶上最高嘅$2,000，一樣大把人圍住嚟問價，唔好話人黐線，Gundam牌頭，又係心頭好，再加日本都已經冇貨，𠵱家唔買，唔使旨意再有貨返，唔好話筆者冇提過你！
文、攝：野狼

日本一出即斷市
呢個星期Game場焦點，去晒隻《高達：宇宙相逢篇》度，有Demo嘅地方一定見到大堆人喺度圍住睇兼問價。普通版賣緊$400，唔算太離譜，不過特別限定版就炒上$1,550，甚至二千蚊天價嘅成交紀錄！日本只有二萬套，而日本秋葉原亦即斷貨，拍賣網最低標價要成二千蚊！

特別版完全解構
呢隻《高達：宇宙相逢篇》被炒起，雖然好多人問價，但能夠開盒一窺其貌嘅人真係唔多！今日就等筆者完成大家嘅願望，等心思思嘅機迷睇真啲再決定。

Check1仿高達使用手冊說明書：
完全抄足電視版高達一年戰爭內，亞寶所用嘅高達使用手冊Design，型到爆！而且用嚟做遊戲使用說明書，功能好夾，唔知睇完會唔會好似新類型人咁功呢？

Check2登場機體3D圖集：
全部用電腦繪圖嘅3D圖集，全部都係登場機體相片，好多人都估唔到有自護號、京寶梵等機體出現，不過呢本書就作完全披露。

Check3限定版RX-78四號機：
唔好睇少呢隻MIA膠公仔，由於只會跟Game送，亦唔會再出，所以一樣係極罕有；照以住MIA限定版炒價，大概可以去到$800至$1,000，所以呢隻亦唔例外！

Check4第一代《GundamV1.5》：
特別限定版先至有跟Game送返初代《GundamVer.1.5》，基本遊戲同舊版完全一樣，不過遊戲速度明顯提高了！估計市值$300左右！

評：講真！隻MIA加第一代《機動戰士高達Ver.1.5》，嗰度已經值成$1,300，加埋電視版高達一年戰爭DVD剪輯、Game碟、圖集、說明書等，賣價千五蚊度，Fans尚可接受！

新Game試玩
畫面靚打得爽
筆者曾試玩過金碟，遊戲明顯在貼圖、畫面方面改進好多，好多人早前抱懷疑嘅LockOn系統，今次正式版真係準確好多，唔會話打嚟打去都搵唔到敵蹤，所以遊戲整體感覺爽利好多！論畫面，亦可算係高達出過所有Game中，暫時畫面最靚嘅，最過份係每版過場有段電視版《高達一年戰爭》睇，真係電影感、投入度十足！

售賣點：DreamStore
查詢電話：25753285
地址：灣仔東方188商場二樓256號舖