梅艷芳前日勇敢地站出來，承認患了子宮頸癌，不少圈中人都對其病情表示十分關注。
朱茵： 我聽到阿梅患癌嘅消息好震驚，希望佢可以早日康復，吉人自有天相。我都認識阿梅，我會為佢祈禱，佢好友善。阿梅承認佢嘅病，我覺得佢好堅強。
陳慧琳： 我早排都傷風，大病一場，我好明白病人嘅心情，但阿梅重撐住要開演唱會，佢好犀利，換轉我就唔會開，我病時都想將接咗嘅工作推咗佢，呢啲有苦自己知。
何韻詩： 阿梅𠵱家精神同心情都幾好，希望大家可以體諒佢，佢身體同心境都需要休息。畀番多啲空間佢，況且佢都出嚟交代咗，我作為徒弟嘅只可以喺背後支持。我哋成班朋友前幾日重上去陪佢食飯，始終有起事上來朋友係最重要。
米雪： 我覺得阿梅已經好叻，好堅強，其實最重要都係病者心境開朗，如果有人激你，最好一笑置之。病人嘅意願係點都係好緊要，總之祝阿梅早日康復。