話咁快重有三日左右，就係法蘭克福車展舉行嘅大日子，屆時德國奧迪汽車將會於場內展出多款新車；而當中最受車迷注視嘅，相信非全新S4Cabriolet開篷跑車莫屬。
從外形所見，全新奧迪S4Cabriolet外形與同廠備受追捧嘅A4Cabriolet相近，但卻改用上S系跑車常見嘅跑車尾喉，以及18吋跑車合金胎軨連235/40R18輪胎，望落份外吸引突出；與此同時，車廂空間除來得寬敞闊落，加上承托力甚豐嘅跑車座椅，令乘坐舒適度十足外，設備配搭亦見齊全易用，當然梗係唔少得重有S系跑車專用嘅三幅式軚環啦！
不過，相信最惹人注目會係車上一台4.2升V8DOHC引擎，除馬力輸出高達344ps/7000rpm外，扭力輸出亦達41.8kgm/3500rpm，匹配6前速手波或6前速Tiptronic半自動波，起步加速強而有勁，絕能令人留有深刻印象。有興趣嘅車迷，記住留意關於此車嘅最新消息喇！
