大會安排二百多位香港學生，喺球場四周為各支球隊打氣，其中澳洲班啦啦隊就最抵讚，事關澳洲同其他球隊實力有距離，攞分機會唔多，不過啦啦隊並冇氣餒，反而好珍惜每次澳洲得分機會，就大聲吶喊，重自制「gogogo，Australia」（去吧，澳洲），專業精神值得一讚。
頭場南韓對澳洲的比賽快過打針，下晝兩點就打完，但尾場中國對多明尼加要三點半先開波，好彩大會安排幾個得意的有獎遊戲，既考現場觀眾球技，又送出中國隊簽名T恤，咁先冇乜悶場。
噚日比賽完畢最大餘興，就係場外簽名會，中國隊三位主力趙蕊蕊、劉亞男同楊昊就幫幾百位球迷逐一簽名，現場所見，以趙蕊蕊最多Fans，佢地自製橫額外，重不時大嗌「蕊蕊」，而三位球員冇理周身汗，都堅持簽晒先肯走，難怪中國隊咁受香港球迷歡迎。